28 Jullu 2026 – Ministra Saúde (MS) dr. Élia A.A. dos Reis Amaral, SH, akompaña hosi Dr. Nitim Verma, reprezentante East Timor Eye Program (ETEP) Timor-Leste (TL), no Diretóra Enfermagen Hospitál Nasionál Guido Valadares (HNGV), Enf. Maximiana L. S. Ferrão, hala’o vizita ba primeiru kazu operasaun matan ne’ebé uza Vitreo Retina Machine, iha HNGV, Bidau Tokobaru, Díli.

Vizita ida-ne’e marka pasu importante ida iha esforsu Governu hodi hadia servisu saúde matan no hasa’e kapasidade tratamentu ba pasiente sira ho moras matan nian.

Agora daudaun, HNGV iha ona Vitreo Retina Machine, ekipamentu médiku modernu ne’ebé permite ekipa espesialista sira hala’o operasaun retina ho efisiénsia no presizaun aas. Ekipamentu ida-ne’e sei kontribui atu hasa’e asesu ba servisu oftalmolojia espesializadu no fó oportunidade ba pasiente TL atu hetan tratamentu iha rai-laran.

Makina refere suporta hosi East Timor Eye Program (ETEP) no Royal Australian and New Zealand College of Ophthalmologists (RANZCO), nu’udar parte hosi parseria kontinuada atu fortalese sistema saúde Timor-Leste, liuliu iha área saúde matan.

Ministériu Saúde (MdS) mós agradese ba ETEP no RANZCO tanba sira-nia apoiu no kompromisu hodi dezenvolve servisu oftalmolojia iha TL. Parseria ida-ne’e hatudu importánsia kolaborasaun internasionál atu garante povu TL asesu ba servisu saúde ne’ebé di’ak, seguru no ho padraun aas.

#MidiaPalacioDasCinzas