OE-CUSSE– 06.Agostu.2026  Ministériu Edukasaun ensera ofisialmente Programa Formasaun Intensivu ba Manorin Nível Pré-Eskolár* iha loron Sesta-feira, 1 Agostu 2026 iha *Institutu Formasaun Dosente no Profisionál Edukasaun (INFORDEPE)*, Rejiaun Administrativa Espesiál Oe-Cusse Ambeno (RAEOA).

Formasaun ne’ebé hala’o durante semana ida, hahú husi 27 Jullu to’o 1 Agostu ne’e, partisipa husi *edukadór na’in-16* kompostu husi *feto 10 no mane 6* ne’ebé mai husi sentru pré-eskolár oioin iha RAEOA.

Objetivu prinsipál husi formasaun ne’e atu hasa’e kapasidade manorin sira* iha implementasaun kurrikulu pré-eskolár foun, uza metodolojia hanorin ne’ebé sentradu ba labarik, no prepara ambiente aprendizajen ne’ebé di’ak ba labarik sira idade 4-5 tinan.

Iha nia intervensaun, *Formadór Jacinto Sila* hatete katak Ministériu Edukasaun liuhosi Diresaun Pré-Eskolár tau importánsia boot ba dezenvolvimentu labarik sira-nia futuru iha área bázika.

“Atu dezenvolve labarik sira-nia futuru iha área numerasia no literasia, Ministériu Edukasaun prepara ona materiál hotu-hotu hodi suporta hasa’e labarik sira-nia koñesimentu. Ami husu ba formandu sira atu domina matéria ne’ebé iha, hodi nune’e bele fasilita sira ezerse sira-nia knaar iha eskola ho di’ak liu tan,” dehan Jacinto.

Profesór Alarico Teme* husi *Sentru Sakato* dehan, programa ne’e prepara nia atu hanorin di’ak liu labarik sira ho idade 5 ba leten molok sira tama ba Ensinu Báziku.

“Liuhosi programa intensivu ne’e, ami aprende oinsá atu hanorin di’ak liu, liuliu kona-ba alfabetu, literasia, numerasia, no kór no forma sira. Ida-ne’e atu enkamiña estudante sira hodi rekoñese no hatene di’ak liu baze ba numerasia no literasia,” nia afirma.

Nune’e mós *Formanda Cecilia Bana Co’a* husi *Sentru Oe-Nunu* sente katak formasaun ne’e fó matadalan ne’ebé kompletu ba nia.

“Benefísiu husi formasaun ne’e kapás tebes tanba aumenta ami-nia kapasidade nu’udar manorin atu fó buat foun ba estudante sira. Formasaun ne'e mós fó planu lisaun sira, ne’ebé bele tulun ami atu komprende di’ak liu saida mak uluk ami seidauk hatene. Ha’u prontu atu implementa iha baze hodi hasa’e sira-nia mentalidade no kapasidade bainhira hakat ba primeiru anu,” nia esplika.

Tuir Ministériu Edukasaun, investe iha formasaun ba manorin pré-eskolár importante tebes tanba ne’e mak faze dahuluk ba labarik sira nia aprendizajen. Kuandu baze literasia no numerasia forte ona, estudante sira sei fasil liu atu tuir prosesu aprendizajen iha Ensinu Báziku.

Ministériu Edukasaun agradese ba INFORDEPE RAEOA no ba manorin sira hotu ne’ebé partisipa ho kompromisu hodi hasa’e kualidade edukasaun iha rejiaun.

*#MédiaME*

*#JustinoNenoQuefi*