DILI, 6 Agostu 2026 – Sua Exelénsia Ministra Edukasaun, Dulce de Jesus Soares, reprezenta Ministériu Edukasaun (ME) hodi asina Memorandu Entendimentu (MoU)ho Federasaun Atletismu Timor-Leste (FATL) iha salaun Ministériu Edukasaun, Dili.

Asinatura MoU ne’e ho objetivu atu reforsa no dezenvolve atividade atletismu iha eskola sira iha territóriu Timor-Leste tomak, ho foku espesial ba labarik sira ho idade 4 to’o 14 anos liu husi implementasaun programa Kid’s Athletics.

Serimónia ne’e hetan mós prezensa husi delegasaun *Asian Athletics* ne’ebé foin to’o iha Dili iha lorokraik. Delegasaun ne’e lidera husi *Sr. Dahlan Jaman B. Al-Mahad, Prezidente Asian Athletics*, akompaña husi *Sr. A. Shuggumarhan, Sekretáriu Jerál Asian Athletics* no *Sr. Irfan Ibrahim, Asistente Prezidente*.

Husi parte nasionál, partisipa mós *Sr. Afranio Xavier Amaral, Prezidente FATL*, *Sra. Marlia L.P. Moniz, Sekretária Jerál FATL* no ofisiál prinsipál sira husi Ministériu Edukasaun.

Liu husi MoU ne’e, parte rua konkorda ba pontu importante sira tuirmai:

1. *Rekoñesimentu ba Importánsia Atletismu*

Atletismu nu’udar modalidade bázika ba desportu hotu-hotu. Tan ne’e, nia la’os de’it hanorin abilidade fízika hanesan halai, haksoit no soe, maibé mós hanorin valór disiplina, respeitu ba malu no espíritu atu hamriik fali bainhira monu.

2. *Implementasaun iha Eskola*

Iha *Pré-Eskolár*: Introdús jogu simples ho movimentu báziku hanesan korida ki’ik, saltu ki’ik no lansamentu simples ne’ebé foku ba diverte.

Iha *Ensinu Báziku*: Dezenvolve abilidade motorika ho korida, saltu/haksoit no soe ho ekipamentu adaptadu ne’ebé foku ba partisipasaun no aprendizajen.

3. *Atualizasaun ba Kuríkulu*

Ministériu Edukasaun sei atualiza matéria disiplina Edukasaun Fizika iha Kuríkulu Nasionál atu aliña ho programa Kid’s Athletics.

4. *Identifikasaun Sedu ba Talentu*

Parte rua sei servisu hamutuk hodi identifika sedu labarik sira ne’ebé iha talentu iha área atletismu hahú husi idade ki’ik.

5. *Apoiu Tékniku no Ekipamentu*

Liu husi parseria ho FATL no Asian Athletics, ME espera hetan apoiu iha formasaun ba profesór Edukasaun Fizika no mós fornese ekipamentu apropriadu ba eskola sira.

Iha nia diskursu, Ministra Dulce de Jesus Soares subliña katak kooperasaun ne’e nu’udar investimentu ba futuru labarik sira.“Ho MoU ne’e ita hakarak garante katak atividade atletismu bele la’o to’o iha eskola hotu, hodi forma labarik sira ne’ebé saudavel, disiplinadu no iha espíritu desportivu. Governu komprometidu atu servisu hamutuk ho federasaun no parseiru internasionál sira hodi dezenvolve desportu nasionál,” hatete Ministra.

Nia mós fiar katak ho kooperasaun ne’e, Timor-Leste sei bele prodús jerasaun foun ho kualidade iha área atletismu no kontribui ba dezenvolvimentu desportu nasionál.

Iha fatin hanesan, Ministériu Edukasaun hato’o agradesimentu ba Federasaun Atletismu Timor-Leste no Asian Athletics ba apoiu no kompromisu hamutuk hodi hari’i baze forte ba desportu iha eskola.

See les