Dili, 04 Agostu 2026; Ministra Saúde (MS) dr. Élia A.A. dos Reis Amaral, hamutuk ho Vise-Ministru ba Fortalesimentu Institusionál Saúde (VMFIS) Sr. José dos Reis Magno no mós Vise-Ministru ba Operasionalizasaun Ospitál (VMOH-Sigla Portugues) dr. Flávio Brandão Mendes de Araújo, Hala’o enkontru Konsellu Diresaun (KD) ho Kuadrus Ezekutivus (KE) Ministériu Saúde (MdS) Iha Salaun Enkontru, Palácio das Cinzas, Caicoli.

Objetivu hosi enkontru ne’e hodi aprejenta kona-ba DIP ba Planu asaun Annual Orsamentu Jerál Estado (OGE) 2027.

Iha biban ne'e alende halo aprezentasaun hosi kada Diresaun sira, no haree liu ba planu no programa servisu MdS nian ne’ebé maka durante ne’e la’o no husu ba diresaun MdS nian hotu-hotu nafatin tau atensaun ba servisu hodi bele mellora di’ak liu tan ba futuru.

Iha enkontru ne'e, hetan mós Vizita Surpreza hosi Primeiru-Ministru (PM) Kay Rala Xanana Gusmão, Vizita refere hala’o sein notifikasaun ofisiál antes, ho objetivu atu observa diretamente situasaun servisu no dezempeñu hosi Kuadrus Ezekutivus (KE) no funsionáriu sira nian iha MdS.

Iha biban ne’e PM mós hala’o diálogu simples ho Kuadrus Ezekutivus MdS nian ne’ebé hala’o hela enkontru Konsellu Diresaun (KD).

PM mós subliña importánsia hosi dixiplina, transparénsia, no hasa’e kualidade servisu saúde ba Timoroan hotu “Ha’u hakarak garante katak servisu saúde disponível duni ba komunidade, liuliu sira ne’ebé iha área remota,” tenik PM bainhira dirije ba dirijentes MdS nian.

Vizita ne’e mós hatudu kompromisu Governu da-9 nian atu hametin sistema saúde nasionál hasoru dezafiu globál no rejionál oioin. Entretantu, lideransa Ministériu Saúde hato’o apresiasaun ba PM nia atensaun direta ba setór saúde.

See less