Dili, 06-08-2026---Diretór-Jerál Sekretária Estadu ba Igualdade-SEI hala’o Enkontru Komite Dirije Peskiza (KDP) ba Estudu Nasionál Prevalénsia ba Bem Estar no Saúde 2025-2026, ne’ebé prezide husi Diretór-Jerál SEI, Sr. Armando da Costa, nu’udar Prezidente Komite, no akompaña husi Direteor INETL, Sr. Silvano Lopez, nu’udar Vice Prezidente Komite, iha Salaun Maria Goreti-SEI, Caicoli.

Objetivu husi enkontru ne’e mak, atu apresia no aprova protokolu no instrumentu pezkiza, nu’udar etapa importante ida atu asegura katak prosesu peskiza hala’o tuir padraun étika no kualidade, hodi produz dadus ne’ebé kredivel, regorozu no reflete realidade Timor-Leste.

Enkontru partisipa husi Membru Komite ne’ebé kompostu husi reprezentante husi SEI, MSSEI, Ministériu Saúde INETL, no Organizasaun Sosiedade Sivíl hanesan, FOKUPERS, AKP, no RHTO, no mós Parseiru Dezenvolvimentu Internasionál sira hanesan DFAT, UN-Women, UNFPA, no UNICEF.

Desde hahu tinan 2025, Komite Dirije Peskiza hala’o ona enkontru dala lima, hodi fó orientasaun estratéjiku no hametin koordenasaun entre instituisaun relevante sira. Agora dadaun estudu tama ona ba faze kuantitativu, ho kolaborasaun forte entre membru komite no parseiru sira atu garante implementasaun peskiza ne’ebé regorozu no rezultadu dadus ne’ebé kredivel, kontekstuál no bele sai baze ba planeamentu no dezenvolvimentu polítika no programa iha futuru.

Prosesu ne’e hetan suporta operasionál, koordenasaun téknika no lojistika husi TAF-Nabilan, no apoiu tékniku husi EQI, ne’ebé kontinua servisu hamutuk ho SEI, INETL no parseiru sira atu asegura katak implementasaun peskiza hala’o ho padraun internasionál no kualidade aas.

SEI agradese ba Membru Komite Dirije Peskiza hotu tanba kompromisu, partisipasaun ativa no servisu hamutuk ne’ebé kontinua hametin kredibilidade no kualidade ba Estudu Nasionál Prevalénsia ba Bem Estar no Saúde 2025-2026.