Dili, 07 Agostu 2026

Ministru Transportes no Komunikasoens, Eng.Miguel Marques Gonçalves Manetelu hamutuk ho Embaixadóra Austrália iha Timor-Leste, Caitlin Wilson, Xefe Operasaun Nasionál no Ofisiál-Enkarregadu Banku Dezenvolvimentu Aziátiku (ADB), Michael Joseph Walsh no Reprezentante Xefe Ajénsia Kooperasaun Internasionál Japaun (JICA) iha Timor-Leste, Fukumori Daisuke, hala’o enkontru ho Vise-Primeiru-Ministru, Ministru Koordenadór bá Asuntu Ekonómiku no Ministru Turizmu no Ambiente, Francisco Kalbuadi Lay.

Enkontru ne’e lidera husi Vise-Primeiru-Ministru, Ministru Koordenadór bá Asuntu Ekonómiku no Ministru Turizmu no Ambiente, Francisco Kalbuadi Lay iha Gabinete Vise-Primeiru-Ministru, Farol, Díli.

Objetivu husi enkontru ne’e atu halo revizaun bá progresu dezenvolvimentu no espansaun Aeroportu Internasionál Prezidente Nicolau Lobato, diskute prioridade sira, identifika dezafiu implementasaun nian no determina medida sira atu garante projetu ne'e bele la’o tuir planu no finaliza ho di’ak.

Vise-Primeiru-Ministru iha nia intervensaun, hato'o agradesimentu bá parséria ne'ebé metin no apoiu husi Governu Austrália, Banku Dezenvolvimentu Aziátiku (ADB) nomos Ajénsia Kooperasaun Internasionál Japaun (JICA) bá dezenvolvimentu infraestrutura transporte iha Timor-Leste. Hodi kontinua hametin parseria entre Governu no parseiru dezenvolvimentu sira sai fatór importante atu hasa'e kapasidade infraestrutura nasaun nian no responde bá nesesidade dezenvolvimentu ekonomia iha futuru.

Durante sorumutu ne'e, parte sira troka hanoin kona-bá estatutu atuál projetu, mekanizmu koordenasaun no etapa sira tuir mai atu aselera implementasaun dezenvolvimentu nomos espansaun aeroportu. Diskusaun ne’e mós foka bá importánsia garante projetu tuir internasionál, aumenta kapasidade servisu aeroportu no apoia Timor-Leste hodi hametin konektividade rejionál no internasionál.

Governu nia komprometidu kontinua servisu hamutuk ho parseiru dezenvolvimentu sira hodi asegura projetu dezenvolvimentu no espansaun Aeroportu Internasionál Prezidente Nicolau Lobato implementa ho efisiente, transparente no fó benefísiu bá povu no dezenvolvimentu ekonomia nasaun nian.

https://sdi.gov.tl/ministerio/presrealease/create

𝐌é𝐝𝐢𝐚 𝐌𝐓𝐊