𝗘𝗥𝗠𝗘𝗥𝗔, 𝗠𝗝 — 𝗦𝗲𝘀𝘁𝗮-𝗳𝗲𝗶𝗿𝗮, 𝟬𝟳 𝗔𝗴𝗼𝘀𝘁𝘂 𝟮𝟬𝟮𝟲, Ministru Justisa, Dr. Sérgio de Jesus Fernandes da Costa Hornai, ofisialmente asina plaka, inaugura moru foun no kuda ai-oan dragaun (Bua-Naga) iha Estabelesimentu Prizionál Gleno, Munisípiu Ermera, nu’udar parte husi esforsu Governu atu reforsa infraestrutura no hasa’e nivel seguransa iha sistema korisionál nasional.

Hafoin inagurasaun no asina plaka, Ministru Justisa hamutuk ho Prezidente Autoridade Munisipál Ermera, Reverendíssimu Padre, veteranu sira, Prezidente Câmara Komérsiu no Indústria Timor-Leste (CCI-TL), Defensor Públiku Jerál, Diretór-Jerál Polítika Justisa no konvidadu sira seluk kontinua ho atividade kuda ai-oan dragaun (Bua-Naga) iha área Estabelesimentu Prizionál Gleno, sai nu’udár símbolu ba dezenvolvimentu no sistema korisionál nasional.

Ministru Justisa reafirma liuhosi nia diskursu katak, investimentu ba infraestrutura prizionál importante atu garante seguransa, fortalese administrasaun no kria kondisaun ne’ebé di’ak ba Guarda Prizionál no rekluzu sira. Nia hateten katak moru foun ne’e sei ajuda prevene risku fuga, hametin sistema vigilánsia no apoia modernizasaun setor justisa.

Ministru mós fahe planu Governu atu dezenvolve atividade produtiva iha Estabelesimentu Prizionál Gleno, atu sai fatin aprendizajen no formasaun vokasionál ba Guarda Prizionál no rekluzu sira, hodi dezenvolve kapasidade no fasilita prosesu reinsersaun sosiál.

IX Governu Konstitusionál liuhosi Ministru Justisa kontinua komprometidu atu halo mudansa liuhosi pasu ki’ik sira, maibé ho kontinuidade, hodi alkansa rezultadu bo’ot ba dezenvolvimentu nasaun. Ministru mós fahe planu Governu atu dezenvolve atividade produtiva iha Estabelesimentu Prizionál Gleno.

“Ita asina plaka no inaugura moru seguransa ida-ne’e. Aban no bainrua, ita hakarak iha planta produtiva ida, maski ki’ik, maibé bele fó rezultadu ho kualidade no sai fatin aprendizajen no formasaun vokasionál ba Guarda Prizionál no rekluzu sira, atu sira bele dezenvolve kapasidade no abilidade ne’ebé útil ba sira nia futuru,” dehan nia.

Ministru esplika katak objetivu hosi iniciativa ida-ne’e la’ós deit atu rekluzu sira hela iha prizaun, maibé atu fó oportunidade ba sira atu participa iha atividade produtiva, dezenvolve kreatividade no inovasaun, nune’e bele fasilita prosesu reinserção sosiál no fó benefísiu ba komunidade.

Nia hateten tan katak Governu kontinua implementa polítika no programa sira atu responde ba nesesidade operasionál iha sistema prizionál, liuliu liuhosi hadi’a infraestrutura ne’ebé durante tinan barak sai hanesan preokupasaun boot ba Guarda Prizionál sira.

Ministru Justisa dehan, investimentu ba moru seguransa no sela reforçadu sira importante tebes atu garante kontrolu no sirkulasaun iha área prizaun, prevene risku fuga no minimiza akontesimentu ne’ebé bele ameasa seguransa.

“Desde tempu ne’ebé ha’u simu responsabilidade nu’udar Ministru Justisa, ha’u rona no simu rekomendasaun hosi diretór no responsavel Servisu Prizionál kona-ba nesesidade atu fortifika infraestrutura. Hanoin hirak-ne’e sai baze importante ba Governu atu kontinua hadi’a sistema prizionál nasional,” dehan nia.

Ministru Justisa subliña katak objetivu boot hosi investimentu ida-ne’e mak atu garante espasu ne’ebé dignu, seguru no konfiável ba sidadaun sira ne’ebé tuir desizaun tribunal tenke hela temporariamente iha estabelecimentu prizionál, ho respeitu ba dignidade umana no hametin sistema seguransa ne’ebé efetivu.

Serimónia inaugurasaun ne’e partisipa hosi veteranu sira, Xefe Suku Fatukero, Xefe Aldeia sira, juventude lokal, Defensor Públiku Jerál, Diretór-Jerál Polítika Justisa, Diretór Sentru Formasaun Jurídika no Judisiária, Diretór Nasionál Teknolojia Informasaun (IT), Diretór Nasionál Servisu Prizionál no Reinserção Sosiál, responsavel Servisu Prizionál hosi Gleno, Suai no Díli, no entidade relevante sira seluk.