Asuntu : 𝐌𝐈𝐍𝐈𝐒𝐓𝐑𝐔 𝐎𝐁𝐑𝐀𝐒 𝐏𝐔́𝐁𝐋𝐈𝐊𝐀𝐒 𝐄N𝐊𝐎𝐍𝐓𝐑𝐔 𝐇𝐎 𝐃𝐄𝐋𝐄𝐆𝐀𝐒𝐀𝐔𝐍 𝐔𝐍𝐈𝐀𝐔𝐍 𝐄𝐒𝐓𝐔𝐃𝐀𝐍𝐓𝐄 𝐔𝐍𝐈𝐕𝐄𝐑𝐒𝐈𝐓𝐀́𝐑𝐈𝐔 𝐌𝐔𝐍𝐈𝐒Í𝐏𝐈𝐔 𝐄𝐑𝐌𝐄𝐑𝐀 (𝐔𝐍𝐄𝐔𝐌𝐄𝐑) 𝐃𝐢𝐥𝐢, 𝟐𝟐 𝐒𝐞𝐭𝐞𝐦𝐛𝐫𝐮 𝟐𝟎𝟐𝟓 Ministru Obras Públikas, Samuel Marçal iha segunda-feira ne’e akompañia husi Vise Ministru Asuntu Infraestrutura, Julio do Carmo, Xefe Gabineti Ministru Obras Públikas, Cristovão Fausto Guterres, Koordenador PMU-Estrada, Amilcar da Costa Victor no Koordenador Unidade Inspesaun Verifikasaun no Pagamentu-Ministériu Obras Públikas (UIVP-MOP), Aleixo do Carmo Amaral ho Ekipa, hala’o ekontru ho delegasaun Uniaun Estudante Universitáriu Munisípiu Ermera (UNEUMER) ligadu ho projetu estrada Gleno bá Letefoho. “Ohin loron ha’u nia alin sira ne’ebé hola parte iha Uniaun Estudante Universitáriu Munisípiu Ermera (UNEUMER), hakarak mai atu rona direita informasaun kona-bá projetu estrada Ermera. Antes ne’e sira rona informasaun ne’ebé kontraditóriu ligadu ho prejetu estrada Gleno-Letefoho. Tanba ne’e mák ohin sira mai atu rona lolos prosesu estrada Gleno-Letefoho to’o ona iha ne’ebé, ”dehan Ministru Obras Públikas. Ministru Obras Públikas, haktuir, ezijensia ne’ebé Uniaun Estudante Universitáriu Munisípiu Ermera (UNEUMER) hato’o ne’e tanba sira preokupa tebes ho kondisaun estrada sira iha Ermera. “Ha’u rekoñese katak kuandu tempu udan ita hotu akompañia hela, la’os de’it kareta ho motor labele lao maibe mós mosu asidenti, kareta dala ruma baku fila halo ema lakon vida no balun tohar. Kestaun sira ne’ebé Uniaun Estudante Universitáriu Munisípiu Ermera (UNEUMER) ne’e ita hotu nia preokupasaun no ita hotu hakarak prosesu ne’e bele lais oituan. Ha’u agradese teb-tebes bá ha’u nia alin estudante sira husi (UNEUMER) ne’ebé hakarak mai rona lolos esplikasaun, prosesu ne’e to’o ona iha ne’ebé,”hateten governante ne’e. Iha biban ne’e Ministru Obras Públikas esplika bá ona delegasaun Uniaun Estudante Universitáriu Munisípiu Ermera, husu sira atu pasiensia oituan tanba prosesu ne’e iha ona nia finalidade, hein loron hira mai taan, banku Mundiál fó ona resposta di’ak, bele hahu’u ona kontratu bá projetu estrada Gleno-Letefoho. “Ohin ha’u esplika bá sira prosesu ne’e han tempu oituan tanba birokrasia naruk, ne’ebé dala ruma ita hakarak lalais maibe ita tenke liu husi dalan ne’ebé legál, importante mák ita iha vontade hakarak lalais no vontade esperansa ne’e labele lakon hodi nune’e ita nia servisu ne’e bele neneik ka lalais ita tenke halo, ”tenik Ministru Obras Públikas. Iha sorumutu ho Ministru Obras Públikas, delegasaun husi Uniaun Estudante Universitáriu Munisípiu Ermera apresia ho sorumutu ne’e tanba parte husi Ministériu Obras Públikas bele fó resposta ne’ebé klaru. Alende delegasaun UEUME husu bá MOP atu aselera lalais projetu estrada Gleno bá Letefoho. *𝐌𝐢́𝐝𝐢𝐚-𝐌𝐎𝐏
Data Publica : 23 Sep 2025
Descrisaun :
