𝟑 𝐀𝐠𝐨𝐬𝐭𝐮 𝟐𝟎𝟐𝟔

==========

Vise-Primeiru-Ministru, Ministru Koordenadór ba Asuntu Ekonómiku (MKAE) no Ministru Turizmu no Ambiente (MTA), Dato' Seri Francisco Kalbuadi Lay, selebra asina Akordu Implementasaun ba Reabilitasaun Terraplén Kosteira no Projetu Jardin ho Estilu Xinés ho Embaixadóra Repúblika Popular Xina iha Timor-Leste, Wang Wenli, ne'ebé hetan apoiu finanseiru husi Governu Xinés.

Akordu ne'ebé kobre implementasaun ba projetu Reabilitasaun Terraplén Kosteira no Projetu Jardín ho Estilu Xinés iha Palásiu Prezidensiál, nu'udar parte husi kooperasaun di'ak entre Timor-Leste no Repúblika Popular Xina iha área dezenvolvimentu infraestrutura hodi hafurak no hakmanek espasu públiku.

Projetu Reabilitasaun Terraplén Kosteira sei fó kontribuisaun importante ba hadi'a seguransa, konservasaun no kualidade área kosteira, enkuantu Projetu Jardín ho Estilu Xinés iha Palásiu Prezidensiál sei aumenta beleza no valór paizajen iha área Palásiu Prezidensiál, ho respeitu ba amizade no kooperasaun entre nasaun rua.

Governu Timor-Leste liuhusi Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, apresia no agradese ba apoiu husi Governu Repúblika Popular Xina ba dezenvolvimentu nasaun no hein katak implementasaun projetu rua ne'e bele la'o ho di'ak, tuir prazu no benefísiu ba povu Timor-Leste.

“Agradese ba Governu Xina tanba apoia hodi halo projetu ne’e. Projetu ne’e asina ona akordu iha tinan tolu liubá ne’ebé mak hahú dezeñu, halo survey ho apoiu tomak husi Governu Xinés nian liuhusi orientasaun Maun Bo’ot Kay Rala Xanana Gusmão hanesan Primeiru-Ministru mak tun hamutuk ho tékniku sira hotu survey, no ekipa rua ne’e tun to’o iha tasi-ibun hahú husi Eis-Embaixada Malázia nian mai to’o iha menara (torre) área Farol nian ne’e. Projetu ida ne’e hanesan oferta husi Governu Xina liuhusi Embaixadóra nia esforsu fó duni projetu ida ne’e mai atu ajuda Timor-Leste. Ita bolu dehan atu halo mudansa liu-liu iha kosteira nian agora finaliza ona, no tékniku sira husi Timor ba ona Beijing hodi tur hamutuk ho tékniku xinés nian hodi finaliza. Ita hanoin katak iha fulan Outubru, tinan ne’e bele komesa projetu ne’e (konstrusaun). Embaixadóra Xina hatete katak, sira sei tenta iha 2028 ne’e bele remata projetu ne’e hodi iha tinan 2029 ita bele simu knaar hanesan Prezidénsia ba ASEAN nian. Projetu ne’e Governu xinés mak fó deit. Ida ne’e ita bele haree katak, dezenvolvimentu bele sai furak liu tan, nune’e mós bele fó benefísiu ba ita-nia povu ho ita hotu, liuliu joven sira iha fatin barak atu asesu ba halimar no diverte”deklara Vise-PM, MKAE no MTA liuhusi konferénsia ba imprensa ne’ebé hala’o iha Gabinete Vise-PM, Farol, Díli, Segunda, 03 Agostu 2026.

Nune’e mós Embaixadóra Xina iha Timor-Leste, Wang Wenli, hatete, projetu ne’e oferese husi Governu Xina ba povu Timor-Leste.

“Ha’u kontente tebes atu ko’alia ba media tanba ita asina ona akordu ba implementasaun projetu ne’e ho Governu Timor-Leste liuhusi Vise-PM, MKAE no MTA. Agradese ba Vise-PM no Governu Timor. Hein katak, projetu ne’e bele fó benefísiu ba povu Timor. Projetu ne’e finansia husi Governu Xina,”deklara Embaixadóra Wang Wenli.

See less