𝑫𝒊́𝒍𝒊, 04 𝑨𝒈𝒐𝒔𝒕𝒖 2026

Ministériu Petróleu no Rekursus Minerais ho Autoridade Nasionál Petróleu – ANP, I.P. planeia estabelese sentru formasaun eselénsia hodi forma rekursu kualifikadu iha setór petróleu no minerál.

Inisiativa ne’e liu-husi assinatura akordu entre ANP, I.P., ho EPOMS no Sarawak Skills husi Malázia iha Tersa-Feira ne’e, hodi realiza estudu viabilidade ba estabelesimentu Extractive Industry Training Center – EITC, iha futuru.

Liu-husi Estudu viabilidade sei hetan avaliasaun kompreensiva husi nesesidade forsa laboral, identifika problema kona-ba kompeténsia no rekomendasaun kona-ba formasaun ho padraun internasionál no implementasaun roteiru ba estabelesimentu EITC ne’ebé exelente, ne’ebé refleta ba prioridade nasionál, industrializasaun no projesaun ba tempu naruk.

Señor Diretór Exekutivu husi Sarawak Skills, Hallman Sabri tenik katak, estabelesimentu EITC refleta ba vizaun investimentu kapital humanu liu-husi edukasaun, formasaun, tékniku vokasional, konsolidasaun institusionál no dezenvolvimentu forsa laborál hodi apoia indústria extrativas, ne’ebé koínside ho optimalizasaun husi rekursus naturais iha Timor-Leste ba dezenvolvimentu ekonómiku.

Programa ne’ebé sei dezeña husi Sarawak Skill orienta ba dezenvolvimentu forsa laboral, hodi hasa’e kapasidade individuál, kapasidade prátika, kompeténsia iha domíniu teknologia no inovasaun no projeta ba kriasaun empregu, hodi kontribui ba kresimentu ekonómiku no dezenvolvimentu sustentável.

Sua Eselénsia Ministru Petróleu no Rekurus Minerais, Francisco da Costa Monteiro destaka importánsia husi estabelesimentu sentru formasaun exelente hodi prepara rekursu ba tempu naruk, atu transforma setór petróleu no minerál ba industrializasaun ne’ebé la’os rekere de’it investimentu, maibé exijénsia kria ekosistema servisu ne’ebé ne’ebé mai husi formasaun.

MPRM ho entidade tutela foka hela ba preparasaun rekursu espesializadu iha setór petróleu no minerál, hodi konretiza vizaun governu nian, atu transforma natureza husi extrativa petróleu no minerál ba industrializasaun.