𝟎𝟓 𝐀𝐠𝐨𝐬𝐭𝐮 𝟐𝟎𝟐𝟔

==========

Vise-Primeiru Ministru, Ministru Koordenadór ba Asuntu Ekonómiku no Ministru Turizmu no Ambiente, Dato' Seri Francisco Kalbuadi Lay, hamutuk ho Prezidente Repúblika, José Ramos-Horta, membru Governu sira, atleta nasionál no internasionál no mós Rosa Mota, lendária maratona ida husi Portugál kuda ai-kameli hun 20 iha resintu Palásiu Nobre, Lahane, Díli, Kuarta, 05 Agostu 2026, hodi Selebra Semana Matak. Semana Matak ne'e inisia husi Prezidente Repúblika, José Ramos-Horta no apoiu husi Governu iha ne'ebé introduz iha Dili International Marathon (DIM) 2026.

Tema maratona ba tinan ida-ne'e mak, "Hadomi Ita-nia Ai-Laran no Balada Fuik sira". Hafoin kuda ai-oan, Prezidente Repúblika oferese BBQ Ofisiál ba atleta internasionál, diplomata, no parseiru dezenvolvimentu sira.

Iha atividade kuda ai-kameli ne'e hetan mos partisipasaun husi artista no influensiadora sira husi Indonézia hanesan parte ida hodi promove turizmu Timor-Leste ba rai-liur.

Atividade ne'e hanesan parte husi esforsu hamutuk atu promove konservasaun natureza, no hametin konsiénsia komunidade kona-bá importánsia proteje ambiente ba jerasaun agora no futuru.

See less