𝟎𝟕 𝐀𝐠𝐨𝐬𝐭𝐮 𝟐𝟎𝟐𝟔

============

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato' Seri Francisco Kalbuadi Lay, lidera enkontru koordenasaun altu nível kona-bá dezenvolvimentu no espansaun Aeroportu Internasionál Prezidente Nicolau Lobato, iha Gabinete Vise-Primeiru-Ministru, Farol, Díli, Sesta, 07 Agostu 2026.

Enkontru ne'e konvoka ho objetivu atu halo revizaun ba progresu implementasaun projetu espansaun Aeroportu Internasionál Prezidente Nicolau Lobato, diskute prioridade sira, identifika dezafiu implementasaun nian, no determina medida sira atu garante projetu ne'e bele la’o tuir planu no remata ho di'ak.

Partisipa iha enkontru ne'e mak Embaixadóra Austrália iha Timor-Leste, Caitlin Wilson, Xefe Operasaun Nasionál no Ofisiál-Enkarregadu Banku Dezenvolvimentu Aziátiku (ADB), Michael Joseph Walsh, no Reprezentante Xefe Ajénsia Kooperasaun Internasionál Japaun (JICA) iha Timor-Leste, Fukumori Daisuke, hamutuk ho Ministru Transporte no Komunikasaun, Miguel Marques Manetelu, no reprezentante hosi ministériu no instituisaun relevante sira.

Vise-Primeiru-Ministru iha nia intervensaun, hato'o agradesimentu ba parseria ne'ebé metin no apoiu hosi Governu Austrália, Banku Dezenvolvimentu Aziátiku (ADB) no Ajénsia Kooperasaun Internasionál Japaun (JICA) ba dezenvolvimentu infraestrutura transporte iha Timor-Leste. Hodi kontinua hateten katak parseria entre Governu no parseiru dezenvolvimentu sira sai fatór importante atu hasa'e kapasidade infraestrutura nasaun nian no responde ba nesesidade dezenvolvimentu ekonomia iha futuru.

Durante sorumutu ne'e, parte sira troka hanoin kona-bá estatutu atuál projetu, mekanizmu koordenasaun, no etapa sira tuirmai atu aselera implementasaun espansaun aeroportu. Diskusaun mos foka ba importánsia garante projetu ne'e bele responde ba padraun internasionál, aumenta kapasidade servisu aeroportu, no apoia objetivu Timor-Leste atu hametin konektividade rejionál no internasionál.

Governu nia kompromisu mak kontinua servisu hamutuk ho parseiru dezenvolvimentu sira hodi asegura projetu dezenvolvimentu no espansaun Aeroportu Internasionál Prezidente Nicolau Lobato implementa ho efisiente, transparente no fó benefísiu ba povu no dezenvolvimentu ekonomia nasaun nian.

See less