𝟏𝟏 𝐀𝐠𝐨𝐬𝐭𝐮 𝟐𝟎𝟐𝟔

=============

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, hala’o enkontru ho Ministru Transporte no Komunikasaun (MTK), Miguel Marques Gonçalves Manetelu, no mos diretór sira husi Waskita Karya, hodi diskute kona-bá progresu no dezenvolvimentu Aeroportu Internasionál Prezidente Nicolau Lobato, Comoro, Díli.

Enkontru ne’e hala'o iha Gabinete Vise-PM, Farol, Dili, Tersa, 11 Agostu 2026, hodi foka ba atualizasaun kona-bá progresu servisu konstrusaun no implementasaun projetu dezenvolvimentu no alargamentu aeroportu nian. Waskita Karya iha responsabilidade ba konstrusaun parte importante hosi infraestrutura aeroportu, inklui servisu relasionadu ho pista.

Importánsia husi projetu Aeroportu Internasionál Prezidente Nicolau Lobato nu’udar infraestrutura ida atu aumenta kapasidade transporte aéreu, hadi’a konektividade internasionál no suporta kreximentu ekonomia no dezenvolvimentu setór turizmu.

Iha enkontru ne’e, parte sira mós diskute nesesidade atu garante koordenasaun di'ak entre instituisaun relevante no empreza responsável, hodi asegura katak implementasaun projetu la'o tuir planeamentu, padraun tékniku no prazu ne’ebé determina.

Projetu dezenvolvimentu aeroportu ne’e envolve mós konstrusaun no reabilitasaun infraestrutura importante, inklui pista, torre kontrolu, sistema iluminasaun no terminal pasajeiru.

Governu kontinua fó prioridade ba projetu ne’e tanba nia papél importante ba preparasaun infraestrutura nasionál, inklui ba Timor-Leste nia kompromisu atu sai uma-na'in ba Simeira ASEAN iha 2029.

See less