𝐄𝐫𝐦𝐞𝐫𝐚, 𝐆𝐥𝐞𝐧𝐨 𝟏𝟒 𝐀𝐠𝐨𝐬𝐭𝐮 𝟐𝟎𝟐𝟔-Semináriu ne’e nia objetivu atu hasa’e koñesimentu no kapasidade partisipante sira kona-ba empreendedorismo iha setór café, liuliu iha área produsaun, prosesamentu, inovasaun no dezenvolvimentu negósiu. Inisiativa ne’e mós importante atu hametin potensiál café Timor-Leste, hodi aumenta nia valor no kontribui ba kresimentu ekonomia nasionál.

𝙈𝙞𝙣𝙞𝙨𝙩𝙧𝙪 𝙉𝙞𝙣𝙤 𝙋𝙚𝙧𝙚𝙞𝙧𝙖, iha ninia intervensaun, husu ba estudante sira, ne’ebé iha terseiru klase Ensinu Sekundáriu, bainhira remata estudu, kontinua sira-nia estudu iha Eskola Superior Estudu no Investigasaun Café (ESEIC). Nia hateten katak oportunidade ida-ne’e bele ajuda estudante sira atu aumenta koñesimentu no kapasidade, liuliu iha área café, empreendedorismo no dezenvolvimentu negósiu.

Ministru mós hateten katak, Ermera mak munisípiu ida ne’ebé iha área plantasaun café bo’ot liu iha Timor-Leste. Tanba ne’e, presiza fó atensaun no prioridade ba hadi’a kualidade café no dezenvolve setór café iha nasaun ne’e.

Nia subliña katak, presiza rekoñese, valoriza no aproveita potensiál café Timor-Leste, liuliu iha aspetu kualidade, produsaun, prosesamentu no valor komersiál. Café nu’udar ida husi produtu estratéjiku Timor-Leste ne’ebé iha folin no potensiál atu aumenta rendimentu agrikultór no komunidade sira, kria oportunidade negósiu no empregu, no kontribui ba dezenvolvimentu ekonomia nasionál.

Ministru enfatiza katak, liuhusi koñesimentu, inovasaun no empreendedorismo, juventude Timor-Leste bele sai parte importante iha dezenvolvimentu setór café, husi produsaun to’o prosesamentu, marketing no komersializasaun, hodi garante katak café Timor-Leste iha kualidade di’ak no iha valor komersiál ne’ebé kompetitivu iha merkadu nasionál no internasionál.

𝙈𝙚𝙙𝙞𝙖 𝙈𝘾𝙄

See less