𝐕𝐢𝐪𝐮𝐞𝐪𝐮𝐞, 𝟏𝟖 𝐀𝐠𝐨𝐬𝐭𝐮 𝟐𝟎𝟐𝟔 –Ministru Komérsiu no Indústria, Nino Pereira, durante vizita traballu iha Munisípiu Viqueque, hala’o atividade oioin, inklui enkontru ho reprezentante juventude, vizita grupu mikro pekena, unidade indústria lokál, merkadu tradisionál no rai ne’ebé sei uza ba konstrusaun Unidade Servisu Deskonsentradu (USD) Ministériu Komérsiu no Indústria.

Durante vizita, Ministru halo enkontru ho reprezentante Juventude Parókia Viqueque, Sr. Ferdy Pinta no Sra. Rita do Loures, ne’ebé aprezenta planu Festival Kultura sei realiza iha Viqueque husi loron 8 to’o 15 Dezembru 2026. Juventude husu apoiu husi MCI atu apoia organizasaun no dinamizasaun atividade kultura iha munisípiu.

Ministru kontinua enkontru ho Sra. Define da Silva Pinto, Diretora Kompañia Tera Timor Furak, ne’ebé husu apoiu ba konstrusaun kafetaria, hanesan parte husi esforsu atu promove negósiu no ekonomia lokál.

Ministru ho komitiva, akompaña husi Sekretáriu Prezidente Autoridade Munisipál Viqueque, halo vizita ba grupu mikro pekena sira ne’ebé hetan ona apoiu liuhosi Programa Kompetisaun Negósiu Inovativu (KNI) hanesan; Unidade Moris Di’ak iha Aldeia Hada, Suku Uma Uain Kraik, fó oportunidade servisu ba traballadór 32 no Grupu Jenuferdes iha Aldeia Naeboruk, Suku Uma Uain Kraik, ho total traballadór 12.

Grupu sira-ne’e mós harii Kooperativa Rai no Empresta Osan (Koperasi Simpan Pinjam) ho kapitál hamutuk USD 25,000, hanesan mekanismu atu apoia atividade negósiu.

Iha oportunidade ne’e halo observasaun ba Kompañia Produsaun Bloku Mahuma iha Aldeia Lamaklaran, Suku Karaubau, hodi haree diretamente prosesu produsaun bloku no atividade negósiu ne’ebé kompañia ne’e hala’o.

Komitiva kontinua halo vizita ba Merkadu Tradisionál Vikeke, ne’ebé agora daudaun hetan rehabilitasaun. Tuir planu, merkadu sei reativa fali atividade komersiál iha fulan Agostu 2026, fó oportunidade ba komersiánti sira atu kontinua apoia ekonomia lokál.

Atividade ikus mak vizita ba rai ne’ebé Autoridade Munisipál Viqueque fó ona ba MCI, ne’ebé sei uza ba konstrusaun edifísiu Unidade Servisu Deskonsetradu (USD) ho objetivu atu haree kondisaun rai no prepara nesesidade konstrusaun, hodi aproxima servisu MCI ba komunidade no emprezáriu sira iha munisípiu.

𝙈𝙚𝙙𝙞𝙖 𝙈𝘾𝙄

See less