𝟏𝟖 𝐀𝐠𝐨𝐬𝐭𝐮 𝟐𝟎𝟐𝟔

============

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, hala’o enkontru ho Sra. Shaima Salem, Adjuntu Xefe Misaun Embaixada Emiradus Árabes Unidus (UAE) iha Timor-Leste, ho objetivu atu hametin relasaun entre Timor-Leste no Emiradus Árabes Unidus, liuhusi diálogu no partilla informasaun kona-bá interese komún.

Iha enkontru ne’ebé hala'o iha Gabinete Vise-PM, Farol, Díli, Tersa, 18 Agostu 2026 ne'e, parte rua troka informasaun kona-bá dezenvolvimentu no situasaun rejionál, inklui atualizasaun kona-bá dinámika iha rejiaun.

Sra. Shaima Salem mos hato’o konvite ba Vise-Primeiru-Ministru atu partisipa iha Resepsaun Amizade Emiradus Árabes Unidus no Timor-Leste, ne’ebé sei hala’o iha 31 Agostu 2026. Atividade ne’e sei sai oportunidade importante atu selebra no hametin amizade no relasaun entre nasaun rua.

Aleinde ne’e, enkontru mos fó espasu atu diskute kona-bá proposta kampaña operasaun matan katarak husi Emiradus Árabes Unidus ne’ebé UAE hakarak hala’o iha Timor-Leste. Inisiativa ne’e konsidera hanesan área potensiál ida ba kooperasaun bilaterál, liuliu iha apoiu ba komunidade no asesu ba servisu oftalmolojia.

Vise-Primeiru-Ministru apresia interese no inisiativa husi Emiradus Árabes Unidus atu kontinua hametin relasaun ho Timor-Leste, no subliña importánsia atu buka oportunidade kooperasaun ne’ebé bele fó benefísiu diretamente ba povu Timor-Leste.

See less