DILI, 13 Agostu 2026 — Sekretaria Estadu Kooperativas (SEKoop) realiza reuniaun alargada ho funsionáriu sira hotu iha Salaun CNE, Kaikoli, Díli, atu diskute no halo konsultasaun kona-ba planu atu estabelese kooperativa primária ba funsionáriu sira.

Sekretáriu Estadu Kooperativas, Arsénio Pereira da Silva, hateten katak reuniaun ne'e importante atu fó introdusaun ba funsionáriu sira kona-ba objetivu no papel kooperativa, liuliu iha ambiente servisu públiku.

“Nia serbisu SEKoop nian mak ba setór kooperativa. Ho esperiénsia husi tempu Indonézia to'o agora iha nasaun foun, kooperasaun iha papel importante,” dehan Arsénio Pereira da Silva ba jornalista sira iha Salaun CNE, Kaikoli, Kinta (13/08).

Tuir nia, setór kooperativa iha área no ramus oioin, no kooperativa primária bele mos estabelese husi grupu funsionáriu sira bazeia ba interese no nesesidade hamutuk.

Arsénio hateten katak inisiativa atu estabelese kooperativa funsionáriu ne'e mos importante tanba SEKoop nu'udar instituisaun responsavel ba promosaun no dezenvolvimentu setór kooperativa tenke fó ezemplu liuhusi nia funsionáriu rasik.

“Dala barak SEKoop ko'alia ona kona-ba setór kooperativa tanba nia iha ramus barak. Balu bele mai husi kooperasaun funsionáriu atu estabelese kooperativa primária,” nia hateten.

Nia hatutan katak prosesu ne'e hahú ho reuniaun inisiál no konsultasaun ho funsionáriu sira hotu atu rona sira-nia hanoin no haree nivel interese antes tama ba prosesu estabelesimentu kooperativa.

Maski nune'e, Sekretáriu Estadu subliña katak funsionáriu sira la bele obriga atu tama ka sai membru kooperativa. Partisipasaun tenke bazeia ba vontade no hakarak rasik husi kada funsionáriu.

“Prinsípiu ne'e tenke tuir hakarak rasik no labele obriga ema ida. Maibé, se ema lubun boot konkorda no hakarak, bele estabelese kooperativa,” nia esplika.

Nia dehan, bainhira funsionáriu sira konkorda atu estabelese kooperativa, prosesu sei kontinua tuir regra, prosedimentu no prosesu legal ne'ebé aplika ba kooperativa, inklui preparasaun estatutu, rejimentu no regulamentu.

Depois de prosesu preparasaun remata, kooperativa sei submete ba rejistu iha notariadu tuir prosedimentu legal, antes hahú nia atividade.

Arsénio mos hateten katak objetivu prinsipál husi inisiativa ne'e mak atu harii kooperativa ne'ebé forte, transparente no bazeia ba prinsipiu kooperativu, nune'e funsionáriu sira bele sai parte husi movimentu kooperativa ne'ebé SEKoop promove iha Timor-Leste.

Tuir informasaun ne'ebé aprezenta iha reuniaun, SEKoop iha funsionáriu liu ema 400, ne'ebé kompostu husi funsionáriu permanente hamutuk ema 39, funsionáriu administrativu no funsionáriu kazual sira.

Reuniaun ne'e marka mos ho prezensa Diretór-Jerál, Eng. Olderico Lopes, GIA, Inspetór Gaspar Policarpo Correia, diretór no xefe sira, asesór sira, no funsionáriu sira seluk ne'ebé hatudu interese no apoiu ba inisiativa estabelesimentu kooperativa funsionáriu.

Inisiativa estabelesimentu kooperativa funsionáriu ne'e sei kontinua ho prosesu konsultasaun no preparasaun tuir prinsipiu, regra no lei kooperativa nian.

#Média SEKoop#

See less