BAUCAU, 12 Agostu 2026 — Sekretaria Estadu Kooperativas (SEKoop), liuhusi Diresaun Nasionál Promosaun Produtu Kooperativas (DNPPC), kontinua promove produtu kooperativas Bafo Kay Rala hodi apoia implementasaun Programa Merenda Eskolár iha Eskola Bázika Filial (EBF) Vila Nova, Baucau Vila, Munisípiu Baucau.

Atividade promosaun ne’e mak dala 12 ne’ebé SEKoop hala’o iha munisípiu sira, ho objetivu atu hasa’e koñesimentu komunidade kona-ba produtu lokál, enkoraja konsumsaun produtu kooperativas no loke asesu merkadu ba produtór lokál sira.

Sekretáriu Estadu Kooperativas, Arsénio Pereira, hateten katak promosaun produtu Bafo Kay Rala ne’e parte husi esforsu Governu atu valoriza produsaun kooperativas no motiva komunidade agrikultór sira atu aumenta produsaun.

Nia mós hato’o apresiasaun ba direksaun EBF Vila Nova tanba simu ekipa SEKoop atu hala’o atividade promosaun iha eskola ne’e. Tuir nia, produtu lokál ne’ebé kooperativas sira produz bele sai parte importante husi merenda eskolár ne’ebé nutritivu no sustentável.

Produtu Bafo Kay Rala ne’ebé hetan promosaun iha atividade ne’e inklui biskuit, sasoro no kaldu Bafo. Promosaun ne’e mós iha objetivu atu hasa’e koñesimentu konsumidór lokál kona-ba benefísiu no potensiál produtu kooperativas.

Antes hala’o atividade iha Baucau, SEKoop ona promove produtu Bafo Kay Rala iha RAEOA, Likisá, Aileu, Ainaru, Covalima, Manatuto, Lautém, Bobonaro, Manufahi, Ermera no Viqueque. Atividade tuir mai sei hala’o iha Munisípiu Díli, atu kontinua promosaun iha nivel nasionál.

Iha okaziaun ne’e, Diretór Edukasaun Munisípiu Baucau, ne’ebé reprezenta Prezidente Autoridade Munisípiu Baucau, hato’o apresiasaun ba SEKoop no husu atu implementasaun programa ne’e kontinua ho di’ak liután.

Nia hateten katak alokasaun orsamentu ba Programa Merenda Eskolár, ne’ebé besik millaun rua dolar, bele sai oportunidade atu hasa’e rendimentu produtór sira liuhusi fornecimentu produtu lokál, inklui produtu Bafo Kay Rala.

“Programa Merenda Eskolár bele hasa’e tan rendimentu produtór sira nian no enkoraja produtór sira atu aumenta produsaun hodi bele fornese ba programa,” dehan nia.

Nia mós hato’o apelu ba komunidade atu aproveita potensiál rai ne’ebé produtivu hodi aumenta produsaun agríkola no kria merkadu ba produtu lokál.

Diretór Edukasaun Munisípiu Baucau hateten katak nia orgullu tanba EBF Vila Nova sai fatin ba atividade promosaun produtu Bafo Kay Rala, no espera katak produtu ne’e bele kontribui ba Programa Merenda Eskolár iha eskola ne’e.

EBF Vila Nova iha atualmente estudante liuhusi 500, no promosaun produtu lokál iha eskola ne’e konsidera bele fó impaktu pozitivu ba nutrisaun estudante sira, no iha tempu hanesan aumenta partisipasaun komunidade iha atividade produsaun agríkola.

Atividade ne’e marka prezensa husi Komandante PNTL Munisípiu Baucau, diretór sira husi liña ministeriál, profesór no estudante sira.

Inisiativa atu uza produtu agríkola lokál ba merenda eskolár ne’e konsistente ho abordagem Programa Merenda Eskolár iha Timor-Leste, ne’ebé promove utilizasaun produtu agríkola lokál iha preparasaun ai-han ba estudante sira. Governu mós define utilizasaun produtu lokál hanesan parte importante husi programa, ho objetivu atu kontribui ba nutrisaun estudante no dezenvolvimentu ekonomia lokál.

Husi inisiativa ne’e, SEKoop espera katak produtu Bafo Kay Rala bele hetan merkadu ne’ebé sustentavel, enkuantu produtór kooperativas sira bele kontinua aumenta produsaun no kontribui ba fornese merenda eskolár ne’ebé nutritivu ba estudante sira.

#Média SEKoop#

See less