Covalima, 15 Agostu 2026| 𝐒𝐮𝐚 𝐄𝐱𝐜𝐞𝐥𝐞̂𝐧𝐜𝐢𝐚 𝐒𝐞𝐜𝐫𝐞𝐭𝐚́𝐫𝐢𝐨 𝐝𝐞 𝐄𝐬𝐭𝐚𝐝𝐨 𝐝𝐚𝐬 𝐅𝐥𝐨𝐫𝐞𝐬𝐭𝐚𝐬 𝐄𝐧𝐠. 𝐅𝐞𝐫𝐧𝐚𝐧𝐝𝐢𝐧𝐨 𝐕𝐢𝐞𝐢𝐫𝐚 𝐝𝐚 𝐂𝐨𝐬𝐭𝐚, 𝐒.𝐇𝐮𝐭, hamutuk ho Estrutura Diresaun Geral Floresta,Realiza Formatura ba Corpu Guarda Floresta(CGF) sira iha Munisípiu Covalima atu hametin koordenasaun no tuir orientasaun servisu halo sensibilizasaun ba komunidade sira kona-ba importánsia hodi fo protesaun no konservasaun floresta, ai-laran sira iha rai laran.

𝐒𝐮𝐚 𝐄𝐱𝐜𝐞𝐥𝐞̂𝐧𝐜𝐢𝐚 𝐒𝐞𝐜𝐫𝐞𝐭𝐚́𝐫𝐢𝐨 𝐝𝐞 𝐄𝐬𝐭𝐚𝐝𝐨 𝐝𝐚𝐬 𝐅𝐥𝐨𝐫𝐞𝐬𝐭𝐚𝐬, informa formatura ne’e sai nu’udar oportunidade ida atu fó orientasaun konaba responsabilidade servisu Corpu Guarda Floresta sira nian atu kontinua hala'o patrollamentu rutina ba fatin risku sira ne'ebé ema tesi ai no sunu rai arbiru, kontrola nafatin hodi nune'e ita hotu bele proteje rekursu naturáis no prevene degradasaun ambientál iha rai laran.

"Floresta, ai-laran ne'e iha papél ne'ebé importante tebes ba moris komunidade nian, liuliu iha protesaun rai, konservasaun bee, prevene erosão no degradasaun rai, no hametin ekosistema. Tanba ne’e, komunidade hotu-hotu presiza partisipa ativamente iha esforsu atu proteje no konserva floresta" dehan S.E.SEF.

Sua Excelência SEF, husu ba Corpu Guarda Floresta sira atu halo sensibilizasaun ba komunidade, hodi eduka no aumenta sira nia konsiénsia kona ba impaktu negativu husi sunu rai no tesi ai ilegal. Prátika sira ne’e bele hamosu degradasaun floresta, estraga fertilidade rai, aumenta erosão no hamenus disponibilidade bee ba komunidade.

Aleinde fo orientasaun jerál, Sua Excelência SEF, mos fó atensaun espesiál ba Foho Taroma, ne’ebé tuir planu sei konsidera atu deklara nu’udar área protejida ida iha Munisípiu Covalima. Corpu Guarda Floresta sei iha papél importante iha monitorizasaun no protesaun área ne’e, hodi garante katak rekursu naturál sira iha laran ne’e bele kontinua konserva ba gerasaun agora no gerasaun futuru.

Sua Excelência SEF orienta mós ba Corpu Guarda Floresta atu halo monitorizasaun regular, observa situasaun iha teritóriu no fó relatóriu bainhira hetan atividade ne’ebé bele ameasa floresta no biodiversidade. Monitorizasaun ne’e importante tebes atu prevene problema antes sai boot no garante implementasaun efetiva ba planu konservasaun.

"Corpu Guarda Floresta kontinua la'o nafatin patrollamentu rutina tama-sai iha área ai-laran, liuliu iha fatin sira ne’ebé iha risku boot ba sunu rai no tesi ai. Patrollamentu tenke hala’o ho responsabilidade, disipliña iha tereñu no tuir prosedimentu servisu, hodi bele identifika no hapara atividade ne’ebé kontra regra protesaun floresta" dehan S.E.SEF.

S.E.SEF, Husu ba Corpu Guarda Floresta sira tenke servisu besik ho komunidade, lideransa lokál no autoriedade relevante sira. Kooperasaun servisu ne’e importante atu hamosu responsabilidade hamutuk iha protesaun floresta, tanba konservasaun natureza la’ós responsabilidade Governu de’it, maibé responsabilidade komunidade no sosiedade tomak.

Iha mensajen ba Guarda Floresta, S.E. SEF informa katak servisu protesaun floresta presiza halo ho laran no ho fuan. Corpu Guarda Floresta sira hotu tenke hatudu integridade, honestidade, responsabilidade no kualidade iha hala’o knaar.

S.E. SEF, subliña katak servisu ba rai no povu presiza bazeia ba interese públiku, respeita ba lei no kompromisu atu proteje patrimóniu naturál Timor-Leste. Guarda Floresta tenke sai ezemplu iha komunidade liuhusi atitude profissional, servisu di’ak no prontidaun atu responde ba ameasa sira ne’ebé bele estraga floresta.

"Protesaun floresta iha Covalima la’ós de’it konaba salva ai, maibé mos konaba proteje rai, bee, biodiversidade no fonte moris ba komunidade. Ho kooperasaun servisu entre SEF, Guarda Floresta, Autoridade lokal no Komunidade, esforsu konservasaun bele sai baze importante ba dezenvolvimentu sustentável iha Timor-Leste" dehan S.E.SEF.

Sua Excelência SEF, Enkoraza nafatin ba Corpu Guarda Floresta sira hotu atu kontinua hala'o servisu ho dedikasaun, laran metin no responsabilidade, tanba floresta, ai-laran sira ne’ebé ita proteje ohin sei sai patrimóniu no benefísiu ba gerasaun sira iha futuru oin mai.

Enkuantu remata ho formatura ne'e Sua Excelência SEF, kontinua hala'o nia servisu hodi akompaña Sua Excelência Primeiru Ministru (PM), Sr. Kay Rala Xanana Gusmão,halo lansamentu fatuk dahuluk ba eskema irrigasaun mota Lomea ne’ebé mak sei fornese bee ba natar hamutuk hetares 3.5 97 ba suku rua,suku Beco no Tasilin hodi hasa’e produsaun hare iha parte Munisipiu Covalima.