𝐀𝐓𝐀Ú𝐑𝐎, 𝟏𝟒 𝐀𝐆𝐎𝐒𝐓𝐔 𝟐𝟎𝟐𝟔 – Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, sesta ne’e, inaugura ofisialmente Kazerna Ofisiál Peskas iha Suku Beloi, Administrasaun Ataúro.

Inaugurasaun kazerna ne’e reprezenta esforsu Governu liuhosi Secretario de Estado das Pescas atu hadi’a no hametin kondisaun servisu iha área peskas, liuliu iha administrasaun lokal, hodi asegura katak servisu públiku iha setor peskas bele lao ho efisiénsia no besik liután ba komunidade peskadór sira.

Iha ninia intervensaun, Sekretáriu Estadu Peskas, Dr. Domingos da Conceição dos Santos “Mau-caro”, hateten katak prezensa infraestrutura no espasu servisu ofisiál iha Ataúro importante tebes atu fasilita koordenasaun, monitorizasaun no implementasaun programa Governu iha setor peskas.

“Kazerna ne’e istorikamente iha Indonesia nia tempu konstrui tiha, maibé la utiliza, entaun vizita sira iha 2024, haree katak laiha espasu propriu ba ita-nia tékniku peskas nian bele halo servisu hodi fó atendimentu di’ak ba komunidade peskadór sira, tanba ne’e ita reabilita no ohin hand over hosi kompañia”.

Portantu orsamentu ne’ebé atribui ba konstrusaun ne’e , total $ 21.000, tanba ne’e nafatin manifesta agradesimentu ba kompañia ne’ebé esforsu di’ak tebes hodi finaliza obra refere.

Kazerna Ofisiál Peskas ne’e mós sei sai nu’udar fatin servisu ba tékniku no funsionáriu sira atu presta asisténsia no servisu ba komunidade, inklui peskadór sira, no hametin kolaborasaun ho lideransa lokal no parte relevante sira.

Sekretariadu Estadu Peskas kontinua komprometidu atu dezenvolve setor peskas sustentável, aumenta produtividade no rendimentu komunidade peskadór sira, no asegura jestaun rekursu tasi ho responsabilidade ba jerasaun ohin no futuru.

Inaugurasaun ne’e marka tan istória ida hosi kompromisu Governu atu aproxima servisu públiku ba komunidade no fortalese dezenvolvimentu setor peskas iha munisípiu Ataúro.

Partisipa iha serimónia inaugurasaun ne’e, Prezidente Autoridade Munisípiu Ataúro, Autoridade Seguransa PNTL ho F-FDTL, komunidade peskadores no konvidadu sira.