𝐃𝐨𝐭𝐢𝐤, 𝐌𝐚𝐧𝐮𝐟𝐚𝐡𝐢 𝟏𝟒.𝐀𝐠𝐨𝐬𝐭𝐮.𝟐𝟎𝟐𝟔 || Sekretáriu Estadu Pekuária, 𝐉𝐨𝐬é 𝐕𝐢𝐞𝐢𝐫𝐚 𝐝𝐞 𝐀𝐫𝐚ú𝐣𝐨 Kontinua viagem servisu ba Sentru Dezenvolvimentu no Treinamentu Pekuária (CDTP) iha Postu Administrativu Alas, Munisípiu Manufahi, hodi observa diretamente progresu servisu, kondisaun sentru no atividade hakiak animal ne’ebé hala’o iha fatin refere.

CDTP Dotik iha área aproximadamente 30 hektare no parte ida husi sentru importante ba treinamentu no dezenvolvimentu setor pekuária. Iha sentru ne’e, atividade hakiak animal envolve varias espésie, inklui Karau Timor Susuben (KTS), Karau Vaka, no Bibi Etawa, Bibi Boer, Manu Broiler no Manu Mareko.

Ba Karau Timor Susuben (KTS), sentru iha total 11 cabeça, kompostu husi aman 1, inan 10 no inklui oan ida. Enkuantu Karau Vaka hamutuk 32 cabeça. Ba bibi, CDTP Dotik hakiak Bibi Etawa ho aman 2 no inan 4, no Bibi Boer ho aman rua(2) no inan(rua) 2.

Atividade hakiak animal sira ne’e la’ós de’it atu aumenta populasaun animal, maibé mos atu apoia treinamentu, aprendizajen prátiku, reproduzaun no dezenvolvimentu kapasidade téknika iha setor pekuária.

CDTP Dotik mos simu estudante estajiáriu husi Departamento Agro Pekuaria no Jestaun Animais husi 𝐔𝐧𝐢𝐯𝐞𝐫𝐬𝐢𝐝𝐚𝐝𝐞 𝐍𝐚𝐬𝐢𝐨𝐧𝐚𝐥 𝐓𝐢𝐦𝐨𝐫 𝐋𝐨𝐫𝐨𝐬𝐚’𝐞 (𝐔𝐍𝐓𝐋), ne’ebé hala’o estajiu no pratika direta iha sentru durante fulan ida. Oportunidade ne’e fó espasu ba estudante sira atu aplika koñesimentu teóriku iha pratika, liuliu iha área hakiak no jestaun animal, no mos ajuda hametin ligasaun entre instituisaun edukasaun no setor pekuária.

Através husi vizita ne’e, SEPE kontinua fó atensaun ba progresu servisu iha terrenu, hametin supervizaun no koordenasaun ho ekipa téknika, atu CDTP Dotik bele dezenvolve nia poténsia no fó kontribuisaun konkretu ba aumentu produsaun animal, seguransa ai-han no dezenvolvimentu pekuária nasional.