𝐌𝐚𝐧𝐭𝐮𝐭𝐨,𝐂𝐫𝐢𝐛𝐚𝐬 𝟏𝟑.𝐀𝐠𝐨𝐬𝐭𝐮.𝟐𝟎𝟐𝟔 || Sekretáriu Estadu Pekuária, 𝐉𝐨𝐬é 𝐕𝐢𝐞𝐢𝐫𝐚 𝐝𝐞 𝐀𝐫𝐚ú𝐣𝐨, realiza vizita servisu ba Sentru Servisu Saúde Animal, iha Munisípiu Manatuto, Postu Administrativu Manatuto Vila, Suku Cribas, hodi haree diretamente atividade no servisu saúde animal ne’ebé hala’o iha sentru refere.

Iha vizita ne’e, Sekretáriu Estadu Pekuária observa diretamente aimoruk no medikamentu veterináriu ne’ebé prepara no uza hodi prevene moras no proteje saúde animal, inklui atividade vasinasaun ba animal sira.

Vizita ne’e mós sai oportunidade ba SEPE atu haree kondisaun servisu no kapasidade Sentru Servisu Saúde Animal iha nivel munisípiu, liuliu iha aspetu prevensaun moras, kontrolu saúde animal no vasinasaun.

SEPE subliña katak prevensaun no vasinasaun animal tenke kontinua reforsa, tanba saúde animal importante tebes atu garante produsaun pekuária saudável, aumenta produtividade no kontribui ba dezenvolvimentu setor pekuária iha Timor-Leste.