𝐕𝐢𝐪𝐮𝐞𝐪𝐮𝐞 𝟏𝟖 𝐀𝐠𝐨𝐬𝐭𝐮 𝟐𝟎𝟐𝟔 || Sekretáriu Estadu Pekuária (SEPE), 𝐉𝐨𝐬é 𝐕𝐢𝐞𝐢𝐫𝐚 𝐝𝐞 𝐀𝐫𝐚ú𝐣𝐨., 𝐋𝐢𝐜. 𝐂𝐒𝐇, 𝐋𝐢𝐜. 𝐃𝐢𝐫. 𝐌𝐃, 𝐌.𝐀𝐏, realiza viajen servisu ba Sentru Dezenvolvimentu no Treinamentu Pekuária (CDTP) iha Aldeia Dudu Kai Suco Uma Wain Craik, Postu Administrativu Viqueque Vila, Munisípiu Viqueque, hodi observa diretamente atividade dezenvolvimentu pekuária, liuliu produsaun no preparasaun hahan ba animal.

Iha vizita ne’e, SEPE observa diretamente variedade ai-han animal ne’ebé dezenvolve iha sentru, inklui ai lantoro, teramba, rumput gajah, gama, batar kinor, batar kairala no ai-han seluk. Ai-han hirak ne’e kahur hamutuk ho hare’u-uut no prosesu liután hodi produz silajen, ne’ebé bele uza nu’udar fonte hahan ba animal, inklui durante tempu maran.

Sentru refere iha populasaun animal ne’ebé kompostu husi Karau Timor Susuben (KTS) hamutuk 14 kabesa, ho kompozisaun aman 4 no inan 10. Iha mos karau-vaka hamutuk 11 kabesa, kompostu husi inan 10 no aman 1.

Aleinde karau, sentru ne’e mos dezenvolve manu mareko hamutuk 90, no bibí Etawa hamutuk 15, kompostu husi aman 7 no inan 8. Populasaun animal hirak ne’e sai parte importante husi atividade sentru nian atu suporta dezenvolvimentu pekuária no treinamentu ba funsionáriu no komunidade.

Sentru Dezenvolvimentu no Treinamentu Pekuária iha Uma Wain Craik iha área total hamutuk 25 hektare, ne’ebé inklui área espesífiku ba produsaun hahan animal ho luas aproximadamente 10 hektare. Área ne’e uza atu kuda no dezenvolve ai-han animal, hodi garante disponibilidade hahan no apoia produsaun pekuária iha sentru.

Vizita SEPE ne’e reflete kompromisu Governu liuhusi Sekretariadu Estadu Pekuária atu kontinua reforsa sentru dezenvolvimentu pekuária, liuliu iha aspetu produsaun hahan animal, maneiu animal no aplikasaun téknika ne’ebé apropriadu. Produsaun silajen no dezenvolvimentu ai-han animal mos konsidera importante atu garante disponibilidade hahan nutritivu, inklui iha tempu maran, no nune’e bele kontribui ba produtividade no saúde animal.

Ho rekursu rai no populasaun animal ne’ebé iha, Sentru Dezenvolvimentu no Treinamentu Pekuária Uma Wain Craik iha potensial atu sai fatin importante ba demonstrasaun, treinamentu no dezenvolvimentu tékniku pekuária, no mos suporta objetivu Governu atu hasa’e produsaun animal no fortalese seguransa alimentár iha Timor-Leste.