Hanesan baibain, seremónia asina deklarasaun ne'e nu'udar atividade regular no krusiál ida ne'ebé Governu Timor-Leste, liu husi SEFOPE, sempre realiza antes traballadór Timor-oan sira ba servisu iha rai-li'ur. Iha seremónia refere, hetan partisipasaun husi Diretor Interinu DNEE, Sr. Alarico Fernandes; inklui reprezentante, no ajénsia PLMSP.

Iha diskursu ne'e, Diretor Interinu husu traballadór sira hotu atu uza oportunidade ida ne'e atu servisu ho responsabilidade tomak, disiplina, no hatudu atitude diak, atu nune'e bele hetan nafatin konfiansa husi empregador, inklui loke oportunidade mos ba Timor-oan sira seluk. Alende ida ne'e, reprezentante Governu ne'e mos fo hanoin ba traballadór sira atu kria planu investimentu ba futuru, hodi nune'e bele garanti sustentabilidade husi rekursu hotu ne'ebé traballadór sira sei manan wainhira servisu no moris iha Austrália. “Ba servisu hanesan traballadór, no imi fila fali mai sei sai empregador iha ita-nia rain,” Diretor Interinu hateten.

Ikus liu, Diretor Interinu husu ba traballadór no família sira hotu atu nafatin apoia malu iha jornada ida ne'e, liu husi orasaun no kria komunikasaun no relasaun ne'ebé saudável, hodi bele lori susesu boot ba família no nasaun iha futuru.