𝐃𝐈𝐋𝐈, 𝟏𝟒 𝐀𝐠𝐨𝐬𝐭𝐮 𝟐𝟎𝟐𝟔

𝐒𝐮𝐚 𝐄𝐱𝐞𝐥ê𝐧𝐜𝐢𝐚 𝐒𝐞𝐜𝐫𝐞𝐭𝐚𝐫𝐢𝐨 𝐄𝐬𝐭𝐚𝐝𝐨 𝐏𝐫𝐨𝐭𝐞çã𝐨 𝐂𝐢𝐯𝐢𝐥 (𝐒𝐄𝐏𝐂) 𝐃𝐨𝐦𝐢𝐧𝐠𝐨𝐬 𝐌𝐚𝐫𝐢𝐚𝐧𝐨 𝐑𝐞𝐢𝐬,iha kuarta feira foin lalais ne᾽e partisipa iha Sermonia Abertura Parseria Pasífiku 2026, ne’ebé hala’o iha Kampu Demokrasia, Dili.

Parseria Pasífiku 2026 sei hala’o husi loron 13 to’o 26 Agostu 2026 iha Timor-Leste, ho misaun ne’e lidera husi Navál Estadus Unidus Amérika. Vizita ida-ne’e marka mós dala ualu ba misaun Parseria Pasífiku mai Timor-Leste.

Misaun tinan ida-ne’e halibur membru militár sira husi Timor-Leste, Kanadá, Alemaña, Nova Zelándia no Estadus Unidus Amérika, ho Timor-Leste nu’udar nasaun uma-na’in. Parseria ne’e iha objetivu atu hametin interoperabilidade rejionál, hasa’e kapasidade preparasaun no resposta ba dezastre, no aprofunda parseria entre nasaun sira iha rejiaun Indo-Pasífiku.

Parseria Pasífiku 2026 mós reflete Timor-Leste nia papel ne’ebé aumenta iha rejiaun, liuliu tuir adezaun Timor-Leste iha Asosiasaun Nasaun Sudeste Aziátiku (ASEAN) iha Outubru 2025, nu’udar membru foun liu.

Parseria Pasífiku konstitui misaun asisténsia umanitária no preparasaun ba dezastre multinasionál anuál ida-ne’ebé boot liu iha rejiaun Indo-Pasífiku. Tinan-tinan, misaun ne’e halibur nasaun uma-na’in no parseiru internasionál sira iha esforsu koletivu atu hametin interoperabilidade, kapasidade resposta ba dezastre no reziliénsia komunidade.

Liuhusi kooperasaun no partilha esperiénsia entre nasaun sira, Parseria Pasífiku kontribui ba hasa’e prontidaun no kapasidade resposta ba dezastre, enkuantu mós hametin seguransa, estabilidade no relasaun amizade entre povu sira iha rejiaun Indo-Pasífiku.

𝕄𝔼𝔻𝕀𝔸 𝕊𝔼ℙℂ

See less