𝐂𝐨𝐯𝐚𝐥𝐢𝐦𝐚, 𝟏𝟓 𝐀𝐠𝐨𝐬𝐭𝐮 𝟐𝟎𝟐𝟔

Sekretáriu Estadu Dezenvolvimentu Lokál (SEDL), akompaña Primeiru-Ministru (PM), Kay Rala Xanana Gusmão, iha Seremónia Lansamentu Fatuk Da-huluk ba Projetu Konstrusaun Eskema Irrigasaun Maukola–Lomea, ne’ebé realiza iha Suku Beco, Postu Administrativu Zumalai, Munisípiu Covalima.

Projetu estratéjiku ida-ne’e implementa nu’udar parte hosi programa IX Governu Konstitusionál, liu hosi Ministériu Agrikultura, Peskas, Pekuária no Floresta (MAPPF), ho objetivu atu hadi’a infraestrutura irrigasaun no aumenta produtividade agríkola iha área alvu.

Konstrusaun Eskema Irrigasaun Maukola–Lomea sei ezekuta hosi empreza internasionál PT Minarta Dutahutama, ho Dongsung Engineering Co., Ltd. nu’udar konsultór no Markim Timor, Lda. nu’udar parte hosi servisu konsultoria/implementasaun projetu.

Eskema irrigasaun ne’e sei fornese bee ba área agríkola ho luas hamutuk 3.597 hektár, ne’ebé kompostu hosi área Maukola ho 2.916 hektár no Kuluoan ho 681 hektár.

Tuir dezeñu tékniku projetu nian, infraestrutura prinsipal sei inklui weir ho naruk 150 metru, moru protesaun (retaining wall) iha sorin karuk no loos, intake unidade 2 ba Maukola–Kuluoan, no sediment trap unidade 2 ba área Maukola no Kuluoan.

Iha parte rede distribuisaun bee, kanál prinsipál sei iha distánsia hamutuk 7,811 km, kompostu hosi Maukola 1,986 km no Kuluoan 5,825 km. Enkuantu kanál sekundáriu sei to’o 40,582 km, ho Maukola 29,877 km no Kuluoan 10,705 km.

Projetu ne’e iha orsamentu hamutuk US$15.158.570,94, ho durasaun konstrusaun liu hosi tinan rua ho balu.

Ho implementasaun Eskema Irrigasaun Maukola–Lomea, Governu espera atu aumenta asesu komunidade ba bee irrigasaun, hasa’e produtividade no produsaun agríkola, no kontribui ba melhoria ekonomia no qualidade moris komunidade, liuliu ba agrikultór sira iha Munisípiu Covalima.

Media SEDL

See less