𝐂𝐨𝐯𝐚𝐥𝐢𝐦𝐚, 𝟏𝟒 𝐀𝐠𝐨𝐬𝐭𝐮 𝟐𝟎𝟐𝟔

Sekretáriu Estadu Dezenvolvimentu Lokál (SEDL), Mateus W. dos Santos Tallo, hala'o lansamentu fatuk dahuluk ba konstrusaun Postu Saúde iha Aldeia Leidula, Suku Ucecai, Postu Administrativu Zumalai, Munisípiu Covalima, liu hosi Programa Dezenvolvimentu Integradu Munisipál (PDIM), tinan fiskál 2026.

Lansamentu fatuk dahuluk ne’e marka inisiasaun ba projetu infraestrutura postu saúde ida ne’ebé ho objetivu atu hakbesik komunidade hodi asesu ba servisu saúde báziku no reforsa kualidade atendimentu saúde iha área rurál.

Projetu ne’e ho montante total $. 404,592.05, no sei implementa husi *kompañia lokal TITOR UNIPESSOAL, LDA, ho períodu konstrusaun durante fulan neen, husi: 10 Jullu to’o 31 Dezembru 2026, tuir kontratu ne’ebé aprova ona.

Sekretáriu Estadu Dezenvolvimentu Lokál Mateus W. dos Santos Tallo, hatete katak konstrusaun Postu Saúde iha Suku Ucecai ne’e sei fó benefísiu boot ba komunidade, tanba Suku Ucecai hanesan suku ne’ebe rural liu entre suku hotu iha Munisipiu Covalima no antes ne’e komunidade enfrenta difikuldade ba asesu saude no estrada.

“Komunidade sira durante ne’e tenke lao ain loron tomak ba fasilidade Saúde iha Postu Zumalai hodi halo tratamentu ba sira-nia saúde. Ho konstrusaun ida-ne’e, ita espera katak sei ajuda tebes komunidade, liu liu atu pesoál saúde sira bele atende diretamente komunidade iha Suku ida ne’e,” hateten SEDL.

SEDL mós hato’o apresiasaun ba autoridade munisípiu, autoridade postu administrativu, lideransa komunitária no Ministériu Obras Públikas, ne’ebé kontinua halo esforsu atu hadi’a asesibilidade no infraestrutura ba komunidade iha área ne’e.

Ikus liu, SEDL mos fó instrusaun ba autoridade relevante, inklui autoridade lokal no munisipal no lideransa komunitariu sira atu kontinua halo monitorizasaun ba implementasaun projetu refere hodi garante kualidade obra, kumprimentu prazu no implementasaun tuir kondisaun kontratu.

SEDL mós espera katak empreza kontratante bele hala’o konstrusaun tuir tempu no padraun kualidade ne’ebé determina, atu infraestrutura saúde ne’e bele utiliza ho di’ak no fó benefísiu ba komunidade iha tempu naruk.

Iha sorin seluk Komunidade Paulino Caldas sente kontente tanba IX Governu konstitusional bele responde ona komunidade nia preokupasaun ne'ebé durante ne’e la asesu ba nesesidade baziku sira hanesan estrada, eletrisidade no fasilidade saude.

Atividade lansamentu ne’e akompaña mos husi Sekretáriu Munisipal ba asuntu PDIM, Diretór Planu Dezenvolvimentu Integradu Munisipál (PDIM), Diretór Programa Nasionál Dezenvolvimentu Suku (PNDS), autoridade lokal,lideransa komunitariu no komunidade Suku Ucecai.

Media SEDL

See less