𝐁𝐚𝐮𝐜𝐚𝐮, 𝟐𝟐 𝐀𝐠𝐨𝐬𝐭𝐮 𝟐𝟎𝟐𝟔— Sekretáriu Estadu Kooperativas, Eng. Arsénio Pereira da Silva, M.Agr, akompaña husi Diretor-Geral Ministériu Agrikultura, Floresta, Pekuária no Peska, hala’o vizita no partisipa iha atividade Lansamentu Kolleta Hare ne’ebé kuda husi Grupu DAITULA, iha Suku Seisal, Postu Administrativu Baucau, Munisípiu Baucau.

Iha atividade ne’e, Sekretáriu Estadu Kooperativas hato’o apresiasaun no motivasaun ba Grupu DAITULA, ne’ebé foti naran husi Komandante David Alex Daitula, tanba sira hala’o esforsu iha área agrikultura no kontribui diretamente ba dezenvolvimentu no seguransa alimentar iha rai.

Grupu DAITULA hari’i husi veteranu sira ne’ebé, maski sira liu ona tempu servisu no bele deskansa, maibé sei kontinua fó sira-nia kontribuisaun ba povu no nasaun. Liuhusi kooperasaun no esforsu hamutuk, sira buka dalan atu uza rai produtivu hodi ajuda hamenus problema seguransa alimentar ne’ebé povu enfrenta.

“Maski ita tama ona iha era independénsia, ita-nia Aman no Inan Veteranu sira sei nafatin hakarak kontribui ba dezenvolvimentu nasional, liuhusi halo natar hodi fó moris no moris-di’ak ba ema hotu.”

Iha ninia intervensaun, Sekretáriu Estadu mós hato’o parabéns no kongratulasaun ba veteranu sira ne’ebé envolve-an iha atividade agrikultura ne’e, no konsidera sira-nia inisiativa hanesan ezemplu di’ak ba komunidade no jerasaun foun.

Nia mós enkoraja jovens sira atu la’ós hanoin de’it katak, bainhira remata eskola, dalan prinsipál mak tama ba instituisaun estadu atu sai funsionáriu públiku. Nia hateten katak servisu públiku mós iha ninia limitasaun, tanba ne’e jovens, liuliu sira ne’ebé estuda área agrikultura, tenki haree oportunidade iha setor produtivu.

“Bainhira remata eskola, liuliu ba sira ne’ebé aprende kona-ba agrikultura, di’ak liu aprende no aplika koñesimentu iha to’os no natar, tanba agrikultura bele sai fonte rendimentu no kontribui ba seguransa alimentar nasaun,” nune’e nia hato’o.

Atividade "Lansamentu Kolleta Hare Grupu DAITULA" iha hektare ne’en (6 hektare) husi total atus rua walu nolu resin Ida hektare (281 hektare) nebé halo ona kultivasaun, no iha aktividade ne’e hetan mós prezensa husi reprezentante PAM Baucau, Komandu Eskuadra PNTL, APA Baucau, Komandu Militar F-FDTL, no komunidade sira ne’ebé partisipa no sai membru iha Grupu DAITULA.

Inisiativa hanesan ne’e hatudu katak kontribuisaun ba dezenvolvimentu nasional la limita de’it ba servisu iha instituisaun públika, maibé mós bele husi atividade produtiva, liuliu agrikultura, ne’ebé importante tebes ba hari’i ekonomia lokal, hadi’a moris povu no garante seguransa alimentar iha Timor-Leste.

#Média_SEKoop2026

See less