𝗠𝗮𝗹𝗶𝗮𝗻𝗮, 𝟮𝟭 𝗔𝗴𝗼𝘀𝘁𝘂 𝟮𝟬𝟮𝟲 – Ministériu Komérsiu no Indústria (MCI), liuhusi Diresaun-Jerál Indústria, encerra Formasaun Jestaun Eskritóriu ba funsionáriu MCI iha Munisípiu Maliana, ne’ebé hala’o durante loron lima, husi 17 to’o 21 Agostu 2026.

Formasaun ne’e partisipa husi 25 funsionáriu ne’ebé mai husi Munisípiu Bobonaro, Ermera, Liquiçá, RAEOA Oe-Cusse, no funsionáriu MCI iha nivel nasional iha Díli.

Molok encerramentu, partisipante sira simu sesaun formasaun ikus husi representante Instituto Nacional da Administração Pública (INAP), ne’ebé foka ba dezenvolvimentu kapasidade no abilidade básiku iha jestaun eskritóriu. Formasaun ne’e mós fó énfaze ba responsabilidade, integridade, efisiénsia no uza ekipamentu eskritóriu ho apropriadu atu apoia kualidade servisu públiku.

Iha nia mensajen, Diretór-Jerál Indústria, Sr. Jorge Ferreira, hato’o apresiasaun ba formadór sira ne’ebé fahe sira-nia koñesimentu no esperiénsia, no mós agradese ba partisipante sira-nia partisipasaun ativu durante loron lima formasaun.

Nia enkoraja funsionáriu sira atu aplika koñesimentu no abilidade ne’ebé hetan durante formasaun iha sira-nia servisu loroloron, ho komitmentu, responsabilidade no integridade, hodi bele kontribui ba hadi’a kualidade servisu no dezenvolvimentu instituisaun.

Media MCI

See less