𝗗í𝗹𝗶, 𝟮𝟭 𝗔𝗴𝗼𝘀𝘁𝘂 𝟮𝟬𝟮𝟲 – Ministériu Komérsiu no Indústria (MCI), liuhusi Diresaun-Jerál Indústria (DJI), kontinua hala’o vizita ba benefisiáriu programa Kompetisaun negosiu inovativu(KNI), hodi observa diretamente progresu no dezenvolvimentu negósiu sira.

Iha vizita ne’e, Diretór-Jerál Indústria, Sr. Jorge Ferreira, hamutuk ho ekipa téknika, vizita benefisiáriu KNI lima ne’ebé hala’o negósiu ho naran AV3 “Naan Karau Fresku” iha Maliana.

Na’in negósiu, Francisco Soares Viana Mota, hato’o agradesimentu ba MCI tanba apoiu liuhusi programa KNI, ne’ebé nia hetan nia uza hodi sosa konjelador, mákina tesi na’an, ekipamentu sira seluk no karau hodi dezenvolve nia negósiu.

Agora daudaun, AV3 “Naan Karau Fresku” fahe nia produtu ba merkadu lokál iha Maliana, inklui merenda eskolár iha malana tomak no loja hahán sira (Warung) iha Maliana. Negósiu ne’e mós kria oportunidade empregu ba ema na’in neen, kompostu husi mane na’in lima no feto ida ne’ebé toma konta ba finansas.

Durante vizita, Sr. Jorge fó orientasaun kona-ba hadi’a lokalizasaun no sinalizasaun negósiu, hodi fasilita konsumidór sira atu identifika produtu na’an fresku. Nia mós sujere atu negósiu ne’e konsidera diversifikasaun produtu, hanesan na’an bibi no na’an fahi, hodi aumenta oportunidade merkadu no garante sustentabilidade negósiu.

MCI kontinua halo akompañamentu ba benefisiáriu KNI, hodi asegura apoiu ne’ebé sira simu bele kontribui ba dezenvolvimentu negósiu, kriasaun empregu no kresimentu ekonomia lokál.

Media MCI

See less