Dili, 20 Agostu 2026 – Iha ámbitu komemorasaun Loron FALINTIL ba dala-51, estudante sekundáriu sira husi Munisípiu 14 iha Timor-Leste tomak partisipa iha atividade peregrinasaun nasionál tuir “Caminho da Resistência” iha Foho Matebian, Munisípiu Baucau.

Peregrinasaun ne’e hala’o iha loron 19 de Agostu 2026 no hetan akompañamentu husi Dirijente Munisipál, Dirijente Nasionál, Sua Exelénsia Ministra Edukasaun Dulce de Jesus Soares, no mós forsa F-FDTL . Partisipante tomak hahú sira-nia viajen tuku 6:00 dader hodi lao ain sa'e foho to'o iha fatin istóriku Osolear.

Maski hasoru kondisaun natureza ne’ebé extreme no dalan sa'e foho ne’ebé todan, maibé estudante sira hatudu korajen no determinasaun boot hodi kompleta peregrinasaun ne’e to'o iha fatin destinasaun.

Atividade ne’e ninia objetivu maka atu lori jerasaun foun atu sente direitamente difikuldade ne’ebé ita-nia eroi no eroi-nas sira hasoru iha tempu rezisténsia, no hodi hametin valór sakrifísiu, disiplina, unidade no domin ba rai doben.

Iha Osolear, partisipante sira presta omenajen ba kuaze erói no eroi-nas nain 80 resin ne’ebé mate iha tinan 1979 tanba hetan bombardeiu husi forsa inimigu. Sira nia restu hakoi hamutuk iha fatin ne’e ho fatuk boot nu'udar sinál ba krime umanitária.

Hala’o mós momentu silénsiu, orasaun no hasa'e Bandeira RDTL no Bandeira FALINTIL nu'udar omenajen ba sira-nia sakrifísiu.

Osolear daudaun ne'e identifikadu ona nu'udar sítíu istóriku rezisténsia no iha planu husi Governu atu dezenvolve fatin ne’e sai destinu turístiku rezisténsia iha futuru, atu bele sai fatin edukasaun no aprendizajen ba jerasaun foun.

Iha diskursu, Sua Exelénsia Ministra Edukasaun hato’o nia orgullu ba estudante sira ne’ebé partisipa. “Imi hatudu katak espíritu FALINTIL sei moris nafatin. Sa'e foho ne’e ho espíritu hanesan ita-nia avó no avó sira iha ai-laran. Imi mak futuru nasaun nian. Aprende istória, respeita sakrifísiu, no serbisu makaas ba dezenvolvimentu Timor-Leste,” dehan nia.

Dirijente Munisipál sira husi Munisípiu 14 mós hato’o agradese ba organizadór sira tanba fó oportunidade ba estudante sira atu aprende istória ho esperiénsia direta.

Komemorasaun Loron FALINTIL ba dala-51 iha Foho Matebian la’ós de’it serimónia, maibé sai mós ponte importante hodi liga jerasaun rezisténsia ho jerasaun independénsia. Liu husi “Caminho da Resistência”, joven sira aprende katak liberdade ne’ebé ita goza ohin loron hetan liuhusi luta, no sakrifísiu boot.

Atividade ne’e termina ho kanta hamutuk Hino Nasionál no liafuan hamutuk:

VIVA FALINTIL! VIVA POVU TIMOR-LESTE!

*#FALINTIL51 #CaminhoDaResistencia #FohoMatebian

See less