Ministru Agrikultura, Pekuária, Peskas no Floresta (MAPPF), 𝐄𝐧𝐠. 𝐌𝐚𝐫𝐜𝐨𝐬”𝐌𝐀𝐌𝐄𝐓𝐀” 𝐝𝐚 𝐂𝐫𝐮𝐳 hamutuk ho Sekretáriu Estadu Pekuária (SEPE), 𝐉𝐨𝐬é 𝐕𝐢𝐞𝐢𝐫𝐚 𝐝𝐞 𝐀𝐫𝐚ú𝐣𝐨, realiza atividade fahe ekipamentu agríkola no manu mareko ba komunidade sira iha Postu Administrativu Kelikai, Munisípiu Baucau.

Iha atividade ne’e, Governu liu husi MAPPF no SEPE entrega 𝐇𝐚𝐧𝐝 𝐓𝐫𝐚𝐤𝐭𝐨𝐫 𝐫𝐮𝐚 (𝟐) no 𝐦á𝐪𝐮𝐢𝐧𝐚 𝐛𝐚𝐤𝐮 𝐡𝐚𝐫𝐞 𝐡𝐚𝐚𝐭 (𝟒) ba komunidade sira, ho objetivu atu apoia no fasilita atividade agríkola, liuliu iha prosesu preparasaun rai no prosesamentu hare.

Aleinde ekipamentu agríkola sira, Governu mós fahe manu mareko ba komunidade sira hodi apoia dezenvolvimentu setor pekuária no hadi’a produtividade agríkola no pekuária iha nivel komunidade.

Distribuisaun ekipamentu no animál sira ne’e hatudu kompromisu Governu atu kontinua hametin apoiu ba agrikultór no kriador sira, liuliu iha área rurál, hodi aumenta produsaun, produtividade no rendimentu família sira.

Atividade ne’e mós sai parte ida husi esforsu Governu atu promove modernizasaun iha setor agrikultura no pekuária, liuhusi utilizasaun teknolojia no ekipamentu apropriadu ne’ebé bele ajuda komunidade sira halo atividade produsaun ho efisiénsia liután.