07 Agostu 2026: Ministra Saúde (MS) dr. Élia A.A. dos Reis Amaral, SH hala’o abertura ba Serimónia Forum Nasionál ba Susubeen Inan iha Timor-Leste (TL) tinan 2026, ho tema “Susubeen Inan Investimentu Di’ak ba Jerasaun Saudável”, Iha Novu Turismu, Dili.

MS iha ninia diskursu haktuir “Hau sente honra boot hamutuk ho ita hotu iha Fórum Nasional Susubeen Inan iha Selebrasaun Semana Mundial Susubeen Inan 2026.

Semana Mundiál Susubeen Inan selebra iha loron 1 to'o 7 fulan Agostu tinan-tinan. Tema ba tinan ida ne’e maka "Susubeen Inan Investimentu Diak ba Jerasaun Saudável".

Tema ida ne'e fó mensajen importante ida ba ita hotu, investimentu ida ne'ebé di'ak liu ba futuru TL hahú husi kuidadu ba inan no bebé desde loron dahuluk moris nian. Bainhira ita proteje no promove susubeen inan, ita la'ós deit salva moris ita mos prepara jerasaun ida ne'ebé forte, matenek no produtivu.

Susubeen inan mak nutrisaun neʼebé kompletu, seguru no natural ba bebé.

Susubeen proteje bebé hasoru infeksaun, hamenus risku malnutrisaun, ajuda dezenvolvimentu cérebro no kresimentu isin, no hamenus risku mortalidade infantil. Ba inan rasik, susubeen ajuda rekupera depois partu, hamenus risku hemorajia, no proteje hasoru moras balu hanesan kankru susun no kankru ovariu.

Susubeen inan mak parte importante husi Loron 1.000 (rihun ida) Dahuluk Moris Nian, ne'ebé hahú desde konsepsaun, kontinua durante isin-rua, partu no to'o labarik atinje tinan rua.

Tanba ne'e, Ministériu Saúde (MdS) kontinua promove kuidadu integradu ba inan no labarik durante Loron 1.000 Dahuluk Moris Nian, liuhusi servisu saúde maternal no neonatal, nutrisaun, imunizasaun, monitorizasaun kresimentu, edukasaun saúde no promosaun susubeen inan.

Promove susubeen inan la'ós responsabilidade setor saúde deit. Ida ne'e responsabilidade nasional, Governu Timor-Leste reafirma nia kompromisu atu proteje, promove no apoia susubeen inan.

Aleinde ne’e MS mós enkoraja ba Inan sira atu fó susubeen inan eksklusivu durante fulan neen dahuluk no kontinua to'o tinan rua ka liu tan. Ita boot nia susubeen mak prezente valiozu liu ba ita boot nia bebé.

Ba aman sira, ita boot nia apoiu importante tebtebes, ajuda inan iha kuidadu bebé no servisu uma nian. Bainhira aman no inan servisu hamutuk, bebé mos sei moris ho saúde di'ak.

Ba empregadór no setor privadu, ami konvida ita boot sira atu implementa Lei Traballu ho di'ak, prepara ambiente favorável ba inan sira no respeita Kódigu Internasionál kona-ba Komersializasaun Substitutu Susubeen Inan.

MS mós informa ba profissional saúde sira atu kontinua fó informasaun ne'ebé bazeia ba evidénsia siéntífika, akompaña inan sira ho respeitu no empatia, no implementa padraun servisu ne'ebé garante labarik hotu hahú moris ho saúde di'ak.

Futuru TL depende ba saúde no kapasidade jerasaun foun. Bainhira ita investe ba susubeen inan no Loron 1.000 Dahuluk Moris Nian, ita investe ba edukasaun, produtividade, dezenvolvimentu ekonomia no prosperidade nasaun.

Kada inan ne'ebé fó susubeen ba nia bebé, kontribui ona ba jerasaun Timoroan ida neʼebé saudável, matenek no prósperu.

Mai ita hamutuk fortalese buat ne'ebé durante ne'e funsiona di'ak. Mai ita garante katak kada inan hetan apoiu ne'ebé nia presiza no kada bebé hetan oportunidade atu hahú moris ho saúde no dignidade," Tenik MS.

Partisipa iha Serimónia ne’e maka; Reprezentante Organizasaun Mundiál Saúde Timor-Leste (OMS-TL), Reprezentante UNICEF, Diretor Jerál no Nasionál MdS, Profisionál Saúde no Seluk-seluk tán.

#MídiaPalácioDasCinzas