14 Agustu 2026: Ministériu Saúde (MdS) Liuhosi Ekipa Gabinete Inspesaun no Auditoria Saúde (GIAS), hamutuk ho Direasaun Nasionál Farmásia no Medikamentu, hala’o atividade Inspesaun ba fatin terapia ne’ebé uza produtu tabaku, Iha Dom Bosco, Kampung Merdeka, Dili.

objetivu hosi Atividade ne’e mak atu halo verifikasaun no monitorizasaun ba produtu sira ne’ebé uza iha prosesu terapia, liuhosi kolekta amostra produtu tabaku atu submete ba análize Administrativa no laboratóriu, hodi identifika no avalia substánsia ka komponente kimiku ne’ebé eziste iha produtu hirak-ne’e.

Iha atividade ne’e, ekipa inspesaun kolekta amostra husi tipu produtu tabaku haat (4), mak: Tabaku Tani Madjoe, Assikha Habbat’s, Assikha Gold, D’Magnos;

Bazeia ba verifikasaun preliminár durante atividade inspesaun, produtu haat (4) ne’e seidauk identifika hanesan produtu herbal ne’ebé rejistu legalmente. Maski nune’e, produtu hirak-ne’e aprezenta karaterístika hanesan produtu tabaku no uza iha kontestu terapia.

Tanba ne’e, ekipa inspesaun halo kolekta amostra produtu hirak-ne’e atu submete ba prosesu análize no teste laboratóriu kimiku, hodi hetan informasaun téknika no evidénsia sientífika kona-ba kompozisaun no substánsia kimiku ne’ebé eziste iha tabaku nia laran.

Atividade inspesaun no kolekta amostra ne’e importante tebes atu reforsa seguransa saúde públika, no mos atu garante katak produtu sira ne’ebé uza iha kontestu terapia bele avalia ho baze ba evidénsia no padraun tékniku ne’ebé apropriadu.

MdS, liuhosi GIAS-MS no Direasaun Nasionál Farmásia (DNFM), kontinua komprometidu atu hala’o monitorizasaun, verifikasaun no fiskalizasaun ba produtu no prátika sira ne’ebé iha relasaun ho saúde públika, ho objetivu atu promove seguransa, kualidade, konformidade no protesaun ba saúde komunidade.

#MídiaPalácioDasCinzas