18 Agustu 2026: Ministériu Saúde (MdS) liuhosi Departamento Controlu Vector Saúde Ambientál (DCVSA) hala’o serimónia Hand Over ba Fugaun Melloradu “Cook Stove” ba Munisípiu Tolu (3) hanesan Dili, Lautém no Viqueque, iha INFPM, Kampu Alor, Dili.

Objetivu hosi atividade ida-ne’e atu reduz poluisaun liuliu poluisaun ar iha uma-laran, ne’ebé bele mosu husi uza fugaun tradisionál, Fugaun melloradu “Cook Stove” ne’e dezenvolve atu uza energia ho efisiénsia liután no hamenus produsaun fumu durante prosesu te’in.

Tarjetu Benefisiáriu maka grupu Vulnervél sira espesial ba Inan isin rua, inan fó susu ba bebe no labarik tinan lima (5) mai kraik, iha área rurál ne’ebé hetan impaktu hosi mudansa klimátika.

Distribuisaun fugaun melloradu ba Munisípiu Dili, Lautém no Viqueque mós reprezenta esforsu MdS liuhosi DCVSA atu promove ambiente saudável, prátika te’in ne’ebé seguru no sustentavel, no aumenta konsiénsia komunidade kona-ba importánsia husi saúde ambientál.

MdS kontinua kompromete atu hametin programa no atividade sira ne’ebé fó kontribuisaun ba prevensaun poluisaun, proteksaun ambiente no promosaun saúde públika, atu nune’e komunidade sira bele moris iha ambiente ne’ebé saudável no seguru.

Fugaun ne’e hetan apoiu hosi Unicef no Fundus Koica ho totál 900 Item.

Partisipa iha atividade ne’e maka Diretora Jerál Kuidadus Saúde Primária (DJKSP), Reprezentante Unicef, Koica, Diretór Munisípiu no Seluk-seluk tan.

#MídiaPalácioDasCinzas