Díli, 24 Agostu 2026 – Ministériu Komérsiu no Indústria (MCI), liuhusi Diresaun-Jerál Indústria, reprezenta husi Diretor MPME no Diretor-Jerál Indústria Interinu, Sr. Reinaldo Borges, simu pedidu enkontru no konvite husi Universidade Nasionál Timor-Leste (UNTL) atu partisipa iha Semináriu kona-ba Kadeia Valór Ai-han, ne’ebé UNTL organiza hamutuk ho peritu sira husi Japaun.

Enkontru ne’e realiza nu’udar parte husi prosesu konsultasaun entre UNTL no MCI, liuliu kona-ba preparasaun ba semináriu ne’ebé sei realiza iha loron aban. Konsultasaun ne’e iha objetivu atu promove troka informasaun no esperiénsia kona-ba dezenvolvimentu kadeia valór ai-han iha Timor-Leste, inklui koñesimentu kona-ba polítika, prioridade no inisiativa sira ne’ebé Ministériu dezenvolve iha setor ne’e.

Iha okaziaun ne’e, Sr. Reinaldo Borges apresia inisiativa UNTL no peritu sira husi Japaun atu fahe koñesimentu kona-ba kadeia valór ai-han, hahú husi prosesu produsaun, prosesamentu, embalajem no packaging, to’o ba merkadu no konsumidor.

Nia mós subliña, iha realidade, negosiante no prodútór lokál sira sei hasoru dezafiu iha aspetu embalajem no packaging, inklui utilizasaun filafali garafa bee mamuk no materiál sira seluk atu tau no proteje sira-nia produtu. Tanba ne’e, partisipasaun iha semináriu ne’e espera bele fó koñesimentu no ideia foun kona-ba prátika di’ak iha prosesu embalagem, dezenvolvimentu produtu no asesu ba merkadu.

𝙈é𝙙𝙞𝙖 𝙈𝘾𝙄

See less