𝟐𝟒 𝐀𝐠𝐨𝐬𝐭𝐮 𝟐𝟎𝟐𝟔

============

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, partisipa iha Science for Development Summit 2026 no Sci-Tech Expo 2026 (4.ª Edisaun), ho sub-tema “Science, Technology, Innovation, Opportunity”, ne’ebé hala’o husi loron 23 to’o 25 Agostu 2026, iha Centro de Convenções de Díli.

Simeira ne’e nu’udar programa husi Prezidente Repúblika, José Ramos-Horta no koordenadór ba programa ne’e mak Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, iha ne’ebé importante tebes hodi promove kooperasaun no partilla koñesimentu iha área siénsia, teknolojia no inovasaun, liuliu hodi buka oportunidade foun ba dezenvolvimentu sustentável iha Timor-Leste.

Iha eventu ne’e, partisipante sira hetan oportunidade atu rona no aprende husi oradór internasionál sira, inklui Laureadu Nobel da Paz sira no personalidade sira ho esperiénsia iha área siénsia, teknolojia no inovasaun.

Iha loron-primeiru Simeira, Prezidente Repúblika, José Ramos-Horta, no Primeiru-Ministru, Kay Rala Xanana Gusmão, mós marka prezensa hamutuk ho membru Governu, alta konvidadu, reprezentante instituisaun, akadémiku, peskizadór no estudante sira.

Governu konsidera siénsia, teknolojia no inovasaun nu’udar instrumentu ida atu aumenta produtividade, promove kompetitividade no harii ekonomia sustentável ne’ebé bele responde ba nesesidade dezenvolvimentu nasionál.

See less