PORTUGAL, Loron 18 Fullan Agostu Tinan 2026.

S.E.Ministru Planeamentu no Investimentu Estratéjiku-(MPIE), Eng.Gastão Francisco de Sousa no Engenaria, Institutu Públiku (I.P), asina protokolu kooperasaun iha área infraestrutura ho durasaun tinan-rua.

Protokolu kooperasaun ne’e asina husi Ministru Planeamentu no Investimentu Estratéjiku, Gastão Francisco de Sousa no Vogal Konsellu Administrasaun, Infraestrutura de Portugal (IP Engenharia), Maria Amália, sasin husi Sekretária Estadu Mobilidade, Cristina Pinto, iha União das Fraguesias de Almada, Portugal tersa (18/08).

Ministru Gastão Francisco de Sousa hateten ho estabelesimentu protokolu kooperasaun ne’e nu’udar faze foun ida iha seitór Infraestrutura, tanba iha tinan sira liu bá Timor-Leste halo ona esforsu boot atu konstrui no rehabilita infraestrutura públiku sira iha Timor-Leste.

“Dezafiu agora mak atu konsolida investimentu, ne'ebé planu ho di'ak liu, hili ho di'ak liu fatin ne'ebé atu investe no asegura katak saida mak ita hari'i ona hetan jestaun no halo prezervasaun ho di'ak. Mudansa ne'e husi konstrusaun bá planu, jestaun no sustentabilidade ne’e mak sentru bá Protokolu”, Ministru Gastão afirma.

Nia hatutan Ministériu Planeamentu no Investimentu Estratéjiku nia prioridade ida oinsá reforsa investimentu sira hodi foti desizaun ne'ebé bazeia nafatin iha kritériu ekonomiku no tékniku.

Kooperasaun ne’e mós parte husi dalan bá diversifikasaun finansiamentu, nesesidade infraestrutura Timor-Leste nian hodi la bele dependé de'it bá Orsamentu Jerál Estadu.

“Ami kontente tanba kooperasaun ne’e mós abranje aspetu jurídiku, ne'ebé foku bá dezenvolvimentu kuadru jurídiku bá seitór estrada. Ita hakarak asegura seguransa juriídika no instituisaun ne'ebé iha kapasidade atu aplika lei sira”, nia akresenta.

Programa ne’e la’ós halo estudu, lei ka metodolojia, objetivu prinsipál maka hasa’e kapasidade instituisionál liuhusi formasaun ne’ebé sei hala’o iha TL no Portugal, hodi prepara di’ak liu rekursu Timor-Leste nian bá dezenvolvimentu iha seitór infraestrutura.

Governante ne’e akresenta kooperasaun protokolu ho IP - Infraestruturas de Portugal no IP Engenharia ne’e tanba sira iha esperiénsia barak ona no importante liu maka daudaun Timor-Leste nu’udar ona membru ASEAN.

Partisipa iha serimónia asinatura ne’e mak Embaixadór Timor-Leste iha Portugal, Manuel Serrano; Assesor Prinsipál MPIE, Julio Tomas Pinto; Asesora Maria Roussal; no Diretór Jerál Diresaun Nasionál Ordenamentu Territóriu MPIE, Roger Tertuliano Belo.

https://sdi.gov.tl/ministerio/presrealease/create

Média MPIE