ÉVORA, PORTUGAL, 18 Agostu 2026

Igreja Katólika iha Portugal ofisialmente entrega restus mortais Preladu Katólika na’in-tolu, Dom Jaime Garcia Goulart, Dom José Joaquim Ribeiro no Monseñor Martinho da Costa Lopes, bá Governu no Igreja Katólika Timor-Leste.

Serimónia entrega ne’e hala’o liu husi selebrasaun Misa Eukaristia Ação de Graças, ne’ebé prezide husi Nunsiu Apostóliku bá Portugal, Dom Andrés Carrascosa Coso, hamutuk ho Bispu Dioseze Baucau, Dom Leandro Maria Alves, bispu sira husi Portugal no padre sira seluk, iha Sé Katedral Évora.

Misa ne’e realiza hodi fó agradesimentu bá knaar no legadu espirituál Preladu Katólika na’in-tolu antes restus mortais sira kontinua viajen fila bá Timor-Leste.

Nunsiu Apostóliku bá Portugal, Dom Andrés Carrascosa Coso, dehan regresu restus mortais Preladu na’in-tolu bá Timor-Leste la’ós de’it transladasaun, maibé hanesan “regresu bá uma”, Igreja no povu ne’ebé sira servisu durante sira-nia moris.

“Regresu restus mortais Preladu na’in-tolu ne’e la’ós de’it transladasaun, maibé hanesan regresu bá uma bá Igreja no povu ne’ebé sira serve iha sira-nia moris,” nia hateten.

Dom Andrés Carrascosa salienta, Preladu na’in-tolu fila bá Igreja Timor-Leste ne’ebé sira ajuda hari’i no hametin. Tanba ne’e, memória no legadu sira nian tenke transforma sai responsabilidade bá jerasaun sira ne’ebé kontinua kaer knaar iha Igreja.

Nia mós rekoñese kontribuisaun Preladu na’in-tolu iha haforsa fiar Katólika iha Timor-Leste. Dom Jaime Garcia Goulart hala’o knaar iha Dioseze Dili, Dom José Joaquim Ribeiro kontribui bá fortalesimentu vida pastorál, enkuantu Monseñor Martinho da Costa Lopes hala’o ministériu durante períodu difísil iha istória Timor-Leste, iha tempu okupasaun Indonézia.

Nunsiu Apostóliku mós hateten katak durante prosesu luta bá independénsia no períodu sofrimentu, Igreja sai fatin bá orasaun no konsolasaun, defende no proteje dignidade umana povu, no fó esperansa bá povu atu kontinua moris no la lakon esperansa.

Tuir nia, Timor-Leste agora independénte ona no presiza nafatin hametin páz, estabilidade no seguransa. Katak, rekonsiliasaun la’ós signifika haluha memória, maibé purifika memória iha Evanjellu.

Iha serimónia ne’ebá, Ministru Planeamentu no Investimentu Estratéjiku, Gastão Francisco de Sousa, nu’udár membru Komisaun Organizadora no reprezentante Governu Timor-Leste, hato’o agradesimentu bá Igreja Katólika iha Portugál tanba fó oportunidade atu hola parte iha selebrasaun Eukaristia Ação de Graças, nu’udár memória no rekoñesimentu bá Preladu na’in-tolu ne’ebé iha kontribuisaun bo’ot iha istória povu no Estadu Timor-Leste.

Enkuantu ne’e, Bispu Dioseze Baucau, Dom Leandro Maria Alves, hato’o agradesimentu bá Igreja Katólika no sarani Portugál hotu ne’ebé, dezde uluk, kontinua apoia povu Timor-Leste, liuliu iha formasaun rekursu umanu no hametin fiar Katólika.

Dom Leandro dehan Governu Timor-Leste no Igreja Katólika sei lori urna ho restus mortais Preladu Katólika na’in-tolu bá Timor-Leste, hodi haforsa memória no istória evangelizasaun Katólika iha rai Timor.

https://sdi.gov.tl/ministerio/presrealease/create

Média MPIE