Asuntu : PN Aprova Adezaun Timor-Leste nian ba Karta ASEAN iha Plenária Parlamentár Díli, 22 fulan-Setembru 2025 – Parlamentu Nasionál Timor-Leste hala’o reuniaun plenária importante ida hodi diskute no vota Proposta Rezolusaun Númeru 20/VI(3a), kona ba adezaun Repúblika Demokrátika Timor-Leste nian ba Karta Asosiasaun Nasaun Sudeste Aziátiku (ASEAN). Proposta refere hetan aprovasaun ho votos 48 afavór, votu kontra 0 no laiha abstensaun. Sesaun ne’e prezide husi Vise-Prezidente Parlamentu Nasionál ne’ebé halo knaar, no hetan mós prezensa husi Vise-Ministra Negósius Estranjeirus. Nia esplika importánsia adezaun Timor-Leste nian ba ASEAN. Relatoriu husi Komisaun B (Negósius Estranjeirus, Defeza no Seguransa), deputada Sansa Tilman, aprezenta relatóriu no paresér, hodi subliña katak inisiativa ne’e integra iha prosesu admisaun Timor-Leste nian nu’udar membru tomak ba ASEAN. Formalizasaun sei akontese iha cimeira iha loron 26 fulan-Outubru 2025, iha Kuala Lumpur, Malázia. Adezaun ba Karta ASEAN nu’udar rekizitu jurídiku internasionál ne’ebé presiza tebes ba partisipasaun tomak Timor-Leste nian iha órgaun no mekanismu asosiasaun nian. Komisaun B fó paresér favorável ba aprovasaun, hodi konsidera katak proposta rezolusaun ne’e kumpri rekizitus konstitusionál, legál no regimentál, no tuir interese nasionál polítika estranjeira no integrasaun rejonál nian. Nune’e Vise-Ministra ba Asuntu ASEAN, S.E Milena Rangel, enfatiza katak aprovasaun proposta ne’e nu’udar pasu estratéjiku ida ba integrasaun rejonál no konsolidasaun polítika estranjeira nasionál. Ne’e abranje kooperasaun polítika, ekonómika, seguransa no sosiu-kulturál. ©MediaGVMAP Link: PN Aprova Adezaun Timor-Leste nian ba Karta ASEAN iha Plenária Parlamentár | Portal GVMAP
Data Publica : 24 Sep 2025
Descrisaun :