Baucau- 22/08/2026 Ministériu Agrikultura Pekuária Peska no Floresta (MAPPF) hamutuk ho Secretario Estadu Koperativa (SECOP) hamutuk ho Grupu Daitula ne’ebé forma husi veteranus sira hodi kolleta sira nia hare uza makina Agrikola Modernu iha area natar Ossosegue Suku Seiçal Postu Administrativu Baucau Villa.

Iha intervensaun Secretario Estadu Koperativa Arsenio Pereira da Silva, hateten Tanba membru Governu nia de’it mak marka prezensa entaun nia rasik mak halo lansamentu ba kolleta hare ida ne’e. Nia senti onra bo’ot tebes, tanba hare inisiativa husi Veteranus sira ne’ebé mak iha vontade hodi halo natar, konsege kontribui nafatin ba rai ida ne’e, ida ne’e hanesan fo ezemplu diak ida.

Nia hatutan, ba Veteranus sira tuir lolos ne’e sira goja ona sira nia moris ne’e tanba sira hanesan ona mate restu, no tuir lolos jovem sira mak tenki kontinua atividade sira hanesan:Agrikultura Pekuária Peska no Floresta, maibe ita nia aman Veteranus sira ne’e mós sente katak ita labele para ona luta ba ukun a’an ne’e de’it maibe sira nafatin kontribui ba rai ida ne’e liu hosi atividade sira hanesan halo natar, entaun ida ne’e hanesan orgullu bo’ot ida mai ita.

“Tanba ne’e mak hau kongratula tebes ita nia nai veteranus, hau mós konvida ita nia jovem sira iha Suku ida ne’e ka iha ftin ne’ebé de’it, diak liu mai hamutuk tan ba nati tuir ita nia Aman Veteranus sira ne’ebé mak hatudu hela dalan mai ita ne’e. Ita mós nafatin husu apoiu ba Ministériu atu nafatin fo asistensia tekniku no apoiu ekipamentus oinsa mak atu produs produsaun.” Tenik Governante ne’e

Nia mós husu atu ba oin Grupu ida ne’e organiza halo diak liu tan atu nune’e atraves de Secretariu Estadu Koperativa bele fasilita atu bele halo sira nia estatutu tuir koperativa nian, maibe ida ne’e mós kuandu grupu ne’e hakarak nakfilak a’an ba koperativa, tanba koperativa ne’e mak nia atividade ba iha Agrikultura ezemplu hanesan oinsa sira nia prsesu sira husi kultiva to’o kolleta no to’o ba iha merkadu ne’e mós husi parte Koperativa nian bele fo kapasitasaun hanesan fo formasaun tanba kuandu sai koperativa tenki hatene oinsa atu halo jestaun.

Iha fatin hanesan reprezenta Ministru MAPPF aktual Diretor Jeral Agrikultura Café Plantas Industria Martinho Laurentino Soares hatutan, Grupu ne’ebé mak hala’o servisu iha ne’e mesak ita nia Nai Veteranus sira ne’ebé mak uluk kontribui ba funu no sira fila fali mai sei iha inisiativa atu nafatin kontribui ba Setór dezenvolvimentu liu-liu setór Agrikultura, tanba ne’e ita fo parabens ba sira tanba sira sei iha inisiativa atu nafatin fo aten brani liu-liu ba jovem sira atu oinsa fila ba to’os ho natar.

“Ohin loron ita hotu hatene katak, ita nia dependensia ba aihan husi rai liur ne’e bo’ot tebes, tanba ne’e wainhira ita nia Nai Veteranus sira iha vontade atu fila ba to’os ho natar, ita hein katak ba oin ne’e sei bele halo tan buat ruma liu liu hanesan depois de sira kolleta tiha hare, sira mós bele halo tan iha parte Hortikultura nian, tanba iha parte Seiçal mós babain produs modo sira hanesan tomate no mostarda sira.

“Sira mós koalia konaba fasilidade sira ne’ebé mak Governu fahe, katak tratór ne’e la propriu atu halo natar, tanba hand tratór sira ne’e la dun iha kapasidade atu halo natar, depois ami sei informa fali ba Ministru atu prosesu aprovizionamentu ba oin se bele karik sosa buat ne’ebé diak atu nune’e bele fasilita duni ita nia maluk sira.” Nia informa

Nune’e mós Veteranu Marciano da Cruz Soares (Boulesa) haktuir, Iha Timor Ukun a’an nia laran sira nia maluk barak ne’ebé mate ba rai ida ne’e no sira hanesan mate restu sira sei kaer malu nafatin iha prinsipiu ida hodi kria grupu Daitula.

“Ami loke atividade ida halo natar ami husu atu veteranus sira atu mai hamutuk ita halo natar hodi kontinua apoiu dezenvovimentu ba rai ida ne’e ,Ami mós hetan apoiu husi MAPPF mak hanesan makina halai natar ka tratór no tanba mina la iha ami rasik mak sosa mina hodi halai natar hirak ne’e.” katak Veteranu Bou Lesa

Portantu area natar ne’ebé mak kolleita total 6 Ha, area natar ne’ebé mak kolleta inisiativa husi Veteranus sira iha Munisipiu Baucau, depois de kolleita hare ekipa husi SECOP no MAPPF kontinua vizita tan area natar ne’ebé mak halo husi Veteranus sira iha area balun. ekipa DMEA

Secretário de Estado das Cooperativas, Eng. Arsénio Pereira da Silva, M.Agr