DÍLI, 14 Agostu 2026 (SEKOMS) – Sekretáriu Estadu Komunikasaun Sosiál (SEKOMS), Expedito Loro Dias Ximenes, husu ba média ofisiál sira iha liña ministeriál hotu atu bele distingue ka haree ketak entre konferénsia imprensa no komunikadu imprensa, tanba konteúdu husi liafuan rua ne'e la hanesan.

Mensahem ne'e hato'o husi Sekretáriu Estadu bainhira halo abertura ba sorumutu tékniku ofisiál média no protokolu estadu nian, ne'ebé organiza husi SEKOMS hamutuk ho Ministériu Negósius Estranjeirus no Kooperasaun (MNEK) iha Salaun Ministériu Solidariedade Sosiál (MSS), Kaikoli.

Expedito esplika katak komunikadu imprensa mak matéria ka nota informasaun ne'ebé prepara husi média ofisiál ministériu nian kona-ba atividade ruma ne'ebé sira hala'o—hanesan lansamentu ka serimónia ruma—hodi distribui fali ba órgaun komunikasaun sosiál sira.

Iha parte seluk, Sekretáriu Estadu Expedito esplika katak konferénsia imprensa mak enkontru ida ne'ebé organizasaun, pesoál, ka entidade ida hala'o hodi fó sai informasaun ruma diretamante ba jornalista sira, liu husi plataforma dijitál.

Sorumutu ne'e ho objetivu atu fahe koñesimentu báziku kona-ba protokolu estadu nian ba média ofisiál sira, hodi prepara an ba eventu boot Prasidénsia ASEAN Timor-Leste nian ne'ebé sei akontese iha tinan 2029.

Aleinde ne'e, enkontru ne'e mós atu hametin liña koordenasaun ne'ebé di'ak liu kona-ba oinsá organiza atividade sira iha nivel nasionál no internasionál, liuliu iha reuniaun sira husi vizita ofisiál estadu no bilateral.

Diretora Jerál Asuntu Protokolu no Konsulár MNEK, Josefina Tilman, hateten katak formasaun ne'e importa tebes hodi hametin koordenasaun kona-ba oinsá organiza atividade internasionál sira iha reuniaun estadu nian.

Enkontru tékniku ne'e la'o ho di'ak no hetan partisipasaun husi Diretór Jerál SEKOMS, Florindo da Costa, Diretór DNDE, Paulino Quintas, no akompaña husi asesór tékniku SEKOMS nian.