𝟐𝟓 𝐀𝐠𝐨𝐬𝐭𝐮 𝟐𝟎𝟐𝟔

============

Ajénsia Promosaun Investimentu no Esportasaun, I.P. (TradeInvest Timor-Leste) hala’o programa Atribuisaun Deklarasaun Benefísiu Sertifikadu Investimentu ba empreza hamutuk tolu (3) mak hanesan, Prime Timor Enterprise, Lda; EMG-Murak Rai Timor (MRT) E.P. Ilimanu, Lda; no Green Pzz, Lda, iha Gabinete Vise-Primeiru-Ministru, Farol, Díli, Tersa, 25 Agostu 2026.

Sertifikadu Investimentu hirak ne’e atribui husi Vise-Primeiru-Ministru, Ministru Koordenadór ba Asuntu Ekonómiku (MKAE) no Ministru Turizmu no Ambiente (MTA), Dato' Seri Francisco Kalbuadi Lay, ba empreza sira ne’ebé kumpre ona rekizitu no prosesu administrativu tuir lei no regulamentu kona-bá promosaun investimentu iha Timor-Leste.

"Ha'u hato'o parabéns ba imi hotu ne'ebé halo servisu di'ak,"dehan Vise-PM, MKAE no MTA.

Atribuisaun deklarasaun benefísiu ne’e hanesan kompromisu Governu atu kontinua fasilita no promove ambiente investimentu ne’ebé favorável, transparente no kompetitivu. Mekanizmu ida ne’e mos importante atu fó seguransa jurídika no apoiu ba investidór sira iha implementasaun projetu sira iha Timor-Leste.

Governu, liuhusi TradeInvest Timor-Leste, kontinua hametin koordenasaun ho setór privadu no investidór sira hodi atrai investimentu produtivu, aumenta oportunidade empregu, promove dezenvolvimentu setór ekonomia nian no kontribui ba kreximentu ekonómiku iha rai-laran.

See less