Asuntu : Governo Entrega UMbE ba sobrevivente iha Manatuto Manatuto, 19 Setembru 2025 – Iha serimónia simples ida iha Suku Kairui, Postu Administrativu Laleia, Munisipiu Manatuto, Vise-Ministru ba Asuntus Parlamentares (VMAP), S.E Adérito Hugo da Costa, hamutuk ho autoridade sira seluk entrega Uma Memória ba Esperansa (UMbE) ba Sobrevivente Irenia Bi-Bui Fatima de Sousa. UMbE ne’ebé entrega ba Sobrevivente Irenia ho objetivu ida atu valoriza no dignifika nia kontribuisaun ba luta ukun rasik-na. Implementasaun ne bazeia husi rekomendasaun Chega! kona-ba “Reparasaun ba Vítima no hatudu jestu solidariedade estadu nian ba sobrevivente sira. Iha diskursu S.E Adérito Hugo da Costa esplika katak uma ne’ebé entrega ba Sobrevivente Irenia nu’udar “jestu solidariedade estadu nian. “Hodi Ministériu, Presidensia Konsellu Ministru nia naran, ami agradese ba CNC ho Komisariu sira hotu ho ekipa tomak CNC nian. Estadu no governu nafatin imi nia dedikasaun ho rekursu ne’ebé mak imi iha lori nafatin esforsu no mehi koletivu estadu nian atu fo atensaun ba problema ne’ebé ita nia povu infrenta”. Diretór Ezekutivu CNC, Sr. Hugo Maria Fernandes dehan katak “Sobrevivente Irenia merese hetan UMbE tanba reprezenta memória tomak Irenia nia kontribuisaun ba prosesu luta ukun rasik-an”. Iha sorin seluk, SEKomS, S.E Expedito Dias Ximenes, nu’udar Laleia oan, agradese IX Governu Konstitusional tanba halo ona uma ba Sobrevivente Irene, “Uma ne’e governu halo nu’udar simbolu rekoñesimentu ba Laleia oan sira nia kontribuisaun luta ba independénsia”. “Projetu pilotu ida ne’e sei fó oportunidade valiozu ba governu no estadu atu bele haree kle’an liu ba asuntu habokur animál iha rai laran,” dehan S.E. Adérito Hugo da Costa durante nia diskursu iha serimonia ne’e. VMAP hatutan liutan inisiativa ne’e sei fornese dadus importante no esperénsia prátika ne’ebé presiza atu dezenvolve setór pecuária nasionál. Reprezentante família ne’ebé hetan uma refere sente kontente no agradese ba entidade hotu-hotu tanba bele suporta uma furak ida ba sira. Sira mós agradese ba badaen sira tanba bele finaliza uma ida ne’e ho tempu badak – fulan ida ho semana rua de’it. UMbE ne’ebé entrega ba Irenia, nu’udar Vitima ba Violasaun Direitus Umanus Pasadu no agora sai defisiensia fiziku ho medida uma: 63m², Kompostu husi, Kuartu: 3, Haris fatin: 1, Sala vizita no dapur iha parte liur. Tuir dadus Centro Chega!I.P liu hosi Divizaun Solidariedade ba Reparasaun (DSR): Períodu 2021-2025: Centro Chega!I.P entrega ona UMbE ba sobrevivente mais vulneravel hamutuk 20. Iha serimónia ne’e mos entrega Sertifikadu Kuinesimentu ba badaen sira ne’ebé partisipa iha konstrusaun uma. Projetu ne’e sai ezemplu konkretu kona-ba oinsá estadu kontinua responsabilidade atu kuidadu ba nia povu ne’ebé sofre durante konflitu pasadu no presiza apoiu espesiál. Entrega UMbE ne’e hatudu kontinuidade esforsu Governu IX Konstitusional ba reparasaun ba vitima konflitu pasadu, solidariedade ho sobrevivente sira ne’ebé mais vulneravel no rekoñesimentu ba kontribuisaun luta independénsia. Serimónia simples ne’e organiza husi Centro Nacional Chega, marka prezensa maximu husi Vise-Ministru ba Asuntus Parlamentares (VMAP), S.E Adérito Hugo da Costa, Sekretariu Estadu Komunikasaun Sosial (SEKomS), S.E Expedito Dias Ximenes, Diretór Ezekutivu Centro Nacional Chega!I.P, Sr. Hugo Maria Fernandes, Autoridade Munisipiu Manatuto, Asosiasaun Vitima Konflitu Politiku 1974-1999 (AVKP) no familia benefisiaria inklui komunidade balun. ©MediaGVMAP Link: Governo Entrega UMbE ba sobrevivente iha Manatuto | Portal GVMAP
Data Publica : 24 Sep 2025
Descrisaun :
