Asuntu : VMAP Hamutuk ho MAE Partisipa iha Serimonia Kolleta Hare Hibrida iha Manatuto Manatuto, 19 Setembru 2025 — Vise-Ministru ba Asuntus Parlamentares (VMAP), S.E. Adérito Hugo da Costa, hamutuk ho Ministru Administrasaun Estatal (MAE), S.E. Tomás do Rosário Cabral, partisipa ho iha serimónia demostrasaun kolleta hare híbrida iha Munisípiu Manatuto. Eventu ida ne’e marka faze daruak husi projetu kooperasaun agrikultura importante ida ne’ebé hahú implementa tiha ona iha rejiaun ne’e, no serimónia ne’e hala’o iha Aldeia Obrato, Suku Sau, Postu Administrativu Manatuto Vila, Munisípiu Manatuto, Área ida ne’e hili ona hanesan sentru pilotu ba projetu agrikultura modernu, tanba nia kondisaun rai no klima ne’ebé favorable ba kultivasaun hare híbrida. Atividade ne’e mós nu’udar rezultadu husi kooperasaun estratéjiku entre Governu República Populár Xina, Embaixada Xina iha Timor-Leste, Governu Timor-Leste, no liuliu Autoridade Munisípiu Manatuto. Parseiru sira ne’e servisu hamutuk ho objetivu komun ida mak atu haforsa kapasidade agrikultura nasionál no hasa’e moris di’ak ba populasaun rurál. Projetu agrikultura kooperasaun ne’e iha objetivu prinsipál tolu: Primeiru, demonstra teknolojia kultivasaun modernu ba agrikultór lokál sira, atu nune’e sira bele aprende no adopta metodu foun sira ne’ebé bele hasa’e produsaun no kualidade, Segundu, promove uza hare híbrida ne’ebé iha rezisténsia aas ba moras no kondisaun klimátiku sira ne’ebé la favorable, nune’e garantia produsaun ne’ebé estável no Terseiru, kontribui ba seguransa ai-han nasionál liu husi diversifikasaun kultura no aumentu rendimentu agrícola iha rejiaun sira ne’ebé estratéjiku. Implementasaun teknolojia avansada no uza hare híbrida ne’ebé kualidade aas, espera katak projetu ne’e sei hetan rezultadu pozitivu iha termu produtividade no rendimentu ba agrikultór sira. Ida ne’e sei kontribui signifikativamente ba objetivu nasionál ida mak atu hetan autosufisiénsia iha produsaun ai-han, liuliu hare ne’ebé nu’udar ai-han báziku prinsipál ba populasaun Timor-Leste. Kooperasaun ne’e hatudu vontade polítiku husi parseiru sira atu apoia dezenvolvimentu sustentável iha setor agrikultura. Governu Xina, liu husi nia programa asistência téknika, fornese ezpertiza no rekursu sira ne’ebé presiza atu implementa projetu ne’e ho susesu. Embaixada Xina iha Timor-Leste desempeña papel importante hanesan fasilitadór entre governu rua no ajuda koordina atividade sira iha terenu. Maibé, Autoridade Munisípiu Manatuto mós kontribui liu husi disponibiliza rai no mobiliza komunidade lokál sira atu partisipa ho ativu iha projetu ne’e. ©MediaGVMAP Link: VMAP Hamutuk ho MAE Partisipa iha Serimonia Kolleta Hare Hibrida iha Manatuto | Portal GVMAP
Data Publica : 24 Sep 2025
Descrisaun :
