DILI, 26 AGOSTU 2026 – Diretora-Jerál Administrasaun no Finansas Ministériu Edukasaun (ME), Cecilia Maria Belo de Assis , hamutuk ho nia ekipa téknika hala’o reuniaun ho Prezidente Interina Komisaun Funsaun Públika (KFP), Anita Tavares Ribeiro de Jesus, iha edifísiu KFP Matadouro, Dili.

Reuniaun ne’e akompaña mós husi Sekretária Ezekutiva Sekretariadu KFP (SKFP), Maria da Costa Oliveira. Objetivu prinsipal mak atu diskute solusaun ba pagamentu servisu no subsídiu sira ne’ebé pendente ba profesór no funsionáriu sira iha tinan 2026.

Iha reuniaun ne’e, Prezidente Interina KFP, Anita Tavares Ribeiro de Jesus, informa katak Ministériu Finansas (MF) aseita ona proposta orsamentu adisionál ho montante $3 miliaun resin.

Orsamentu ne’e atu kobre pagamentu ba:

- Subsídiu profesór sira ne’ebé servisu iha áreas remotas

- Subsídiu transporte

- Subsídiu ba profesór Pré-Escolar, Ensinu Sekundáriu no Tékniku Vokasionál (ESTV).

- Subsídiu kargu diresaun no xefia.

- Pagamentu mudansa eskalaun

“Orsamentu adisionál ne’e maka dalan ida atu asegura katak ita nia profesór no funsionáriu sira hetan sira nia direitu iha tempu ne’ebé oportunu,” dehan Komisaria Anita.

Komisaria Anita mós esplika katak orsamentu adisionál ne’e la inklui pagamentu ba promosaun, maske Konsellu Ministru aprova ona.

Tanba ne’e, KFP sei kontinua ko’alia ho Ministériu Finansas atu asegura kontinuidade prosesu pagamentu ba promosaun refere.

Entretantu, Sekretária Ezekutiva SKFP, Maria da Costa Oliveira, informa katak Governu suspende rekrutamentu foun hodi fó prioridade ba rezolusaun nesesidade tinan kotuk nian.

Iha ne’e inklui mós nesesidade Ministériu Edukasaun nian ne’ebé tama iha Planu Prioridade Governu (PPG).

Iha oportunidade ne’e, KFP husu ba Ministériu Edukasaun atu finaliza dadus detalhadu kona-ba benefísiu no pagamentu sira ne’ebé pendente iha semana ida-ne’e nia laran.

Dadus ne’e sei submete diretamente ba Ministériu Finansas hodi bele fasilita prosesu pagamentu ho lalais ba profesór no funsionáriu sira.

Ministériu Edukasaun kompromete atu kolabora hamutuk ho KFP no MF hodi rezolve kestaun ne’e ho lalais, hodi valoriza kontribuisaun profesór no funsionáriu sira ba edukasaun iha Timor-Leste.

See less