_Formasaun ho Prátika Terrenu Akompaña Direta husi IGE iha Oe-Cusse_

OE-CUSSE, 27 AGOSTU 2026 – Ministériu Edukasaun, liuhusi Inspesaun Jerál da Edukasaun (IGE), hahú implementa sistema foun *Inspesaun Rutina Dijitál* ho utilizasaun aplikasaun *KoboCollect*. Programa ne’e lansa iha INFORDEPE no kontinua ho prátika no avaliasaun direta iha terrenu iha munisípiu 12 iha rai laran tomak, inklui *Autoridade Administrativa Ataúro* no *Rejiaun Administrativa Espesiál Oe-Cusse Ambeno (RAEOA)*.

Iha observasaun ne’ebé realiza iha loron 27 Agostu iha Oe-Cusse, *Sub-Inspetór Jerál IGE, Jeremias Gomes*, husu ba inspetór eskolar sira atu hahú uza formatu dijitál hodi halibur dadus.

“Ferramenta KoboCollect ne’e atu ajuda ita nia inspetór sira nia serbisu iha terrenu. Ho ne’e ita bele foti dadus kualitativu no kuantitativu ho lalais, loloos iha tempu real no efisiente, hodi kontribui ba hasa’e kualidade edukasaun iha Timor-Leste,” dehan Jeremias Gomes.

Programa ne’e hetan apoiu finanseiru no tékniku husi parseiru dezenvolvimentu *UNICEF*, enkuantu meius no fasilidade ba sala formasaun fornese husi *Programa HANDS*.

Formasaun ne’e foku ba kapasitasaun inspetór sira iha utilizasaun aplikasaun KoboCollect ba foti dadus iha terrenu. Dadus ne’ebé hakarak hetan mak relasiona ho: observasaun sala de aula ba prosesu ensinu no aprendizajem, monitorizasaun disiplina profesór, avaliasaun ambiente eskola, verifikasaun jestaun administrasaun eskola, no kontrolu ba subsídiu eskolar.

Tuir planu, dadus sira ne’e sei fasilita informasaun ba lideransa Ministériu Edukasaun hodi foti desizaun ne’ebé bazeia ba evidénsia.

Nudar parte ida husi formasaun, partisipante sira – ne’ebé mai husi inspetór eskola sira iha munisípiu hotu – obrigatóriu tuir prátika iha terreno..

Atu garante katak koñesimentu ne’ebé hetan iha sala formasaun bele aplika ho di’ak, ekipa IGE halo mós avaliasaun direta ba rezultadu formasaun teoriku no prátiku iha *Eskola EBC Baqui, Oe-Cusse*. Aktividade ne’e lidera direita husi Sub-Inspetór Jerál IGE ba RAEOA.

Inisiativa ne’e reflete kompromisu Ministériu Edukasaun atu moderniza sistema monitorizasaun no inspesaun eskolar, husi manual ba dijitál, hodi asegura transparénsia no kualidade iha jestaun edukasaun nasionál.

See less