Asuntu : SEKRETÁRIA ESTADU BA IGUALDADE FAHE ESPERENSIA TIMOR -LESTE NIA LUTA BA DIREITU FETO NIAN IHA KONFERENSIA NIVEL AAS IHA ANIVERSÁRIU BA DALA HAAT KONFERÉNSIA FETO IHA NOVA IORKE Nova Iorke: 22 Setembru 2025 Sua Exelénsia Sekretária Estadu ba Igualdade (SEI), Sra. Elvina Sousa Carvalho, Reprezenta Estadu Timor-Leste hodi fahe esperensia sira ligadu ba luta Timor-Leste nia kona-ba Direitu Feto nian iha konferénsia nivel aas kona-ba aniversáriu ba dala haat Konferénsia kona-ba Feto, iha Salaun Asembleia Jerál, UNHQ, Nova Iorke iha loron 22 fulan-setembru tinan 2025. Konferensia Feto ne’ebé iha ho Tema "Rekomenda, rekursu no aselera implementasaun Beijing Deklarasaun no Plataforma Asaun atu alkansa igualdade jéneru no Empoderamentu ba feto no labarik-feto hotu". Tan ne’e iha oportunidade ne’e Sua Exelénsia Sekretária Estadu ba Igualdade-SEI, Sra.Elvina Sousa Carvalho hato’o katak Timor – Leste kontinua Servisu makas hodi luta ba Feto nia direitu iha Timor Leste no rekuinese mos realizasaun no servisu ne'ebé seidauk remata hodi promove direitu feto nian. Tuir Sua Exelénsia katak Hahú kedas husi independénsia iha 2002, Timor-Leste tau igualdade jéneru iha nia konstrusaun nasionál nia laran, hakerek direitu hanesan iha nia Konstituisaun no implementa enkuadramentu nasionál sira atu responde ba violénsia bazeia ba jéneru, empoderamentu feto, direitu labarik, inkluzaun defisiénsia, no tráfiku umanu. Orsamentu ne'ebé responsivu ba jéneru mós garante ona rekursu sira ne'ebé diretamente suporta kompromisu hirak-ne'e. Iha ona progresu signifikativu, inklui proporsaun ida husi feto sira iha parlamentu iha Sudeste Aziatiku, hadi'a edukasaun ba labarik-feto sira, saúde inan, no servisu apoiu ba sobrevivente violénsia sira. Maibé feto rurál, feto ho defisiénsia, no joven feto sira sei hasoru hela bareira sistemátika no norma sosiál ne'ebé limita sira-nia oportunidade. Maske iha obstákulu hirak-ne'e, Timor-Leste kontinua haka'as an nafatin atu harii sistema inkluzivu sira no hasa'e igualdade. Haree ba oin, Timor-Leste fó prioridade ba área rua: Liberdade husi Moris-kiak no Violensia Zero. Inisiativa sira hanesan Deklarasaun Maubisse mak dudu empoderamentu ekonómiku feto nian, enkuantu planu asaun nasionál ne'ebé komprensivu foka liu ba eliminasaun violénsia, reforsu instituisaun sira, no haluan apoiu ne'ebé sentru ba sobrevivente sira. Timor-Leste husu ba komunidade internasionál atu hamutuk atu kumpre promesa Pekin nian no asegura futuru ida-ne'ebé feto no labarik-feto sira hela livre husi kiak no violénsia. Iha Oportunidade aas ne’e Sua Exelénsia Sekretária Estadu hetan akompaña husi Xefe-Departamentu Relasaun-Politika no Parseiru Dezenvolvimentu-SEI, Sr. Hermínio Xavier, S.E Embaixador Timor-Leste ba Estadus Unidos, Sr. Denizio Babo nomos Funsionariu Gabinete SEI, Graciela Lay Doutel. https://estatements.unmeetings.org/.../NfaAzAkqxl-u_nyc... Fontes: https://www.facebook.com/share/p/1EjNYZoXyM/
Data Publica : 24 Sep 2025
Descrisaun :
