Dili, 24-08-2026___Dretora Nasionál Relasaun Públika no Média (DNRPM-SEI), Sra. Maria Filomena Babo Martins, sai oradora hodi partilla informasaun kona-ba papél SEI nian ba iha Formasaun ne’ebé mak Organiza husi Institutu Defeza Nasionál (IDN), ho tema “Prevensaun Violénsia Bazeia ba Jéneru: Estratéjia sira ba Dame, Seguransa no Igualdade Jéneru” ba Membru Feto Falentil Forsa Defeza Timor-Leste (F-FDTL), Polísia Nasionál Tmor-Leste (PNTL) no Estudante sira husi Universidade IOB, no abertura husi Sua Exelénsia Xefe Estadu Maior Jenerál F-FDTL, Tenente Jenerál Domingos Raul Falur Rate Laek, iha Kuarter Jenerál F-FDTL Fatuhada.

Objetivu husi Formasaun ne’e mak atu hasa’e kuñesimentu no kapasidade kona-ba Prevensaun no kombate violénsia bazeia ba jéneru (VBJ), liu-liu violénsia doméstika, iha instituisaun no sosiedade.

Sua Exelénsia Xefe Estadu Maior Jenerál F-FDTL, Tenente Jenerál Domingos Raul Falur Rate Laek, iha nia Diskursu ba Sesaun Abertura hatete katak, F-FDTL kontinua promove no halo mudansa atu hasa’e partisipasaun militár feto sira, inklui prepara sra lideransa no pozisaun estratéjika iha instituisaun militár.

“La naton de’t ita iha formasaun oin-oin atu prepara feto sira ba tuir akademia militár iha rai liur. Depois, ita prepara mós feto sira ho pelotaun ida atu ba Nova Zelandia ba misaun umanitária iha Nasaun Unidas nia mahon no agora ita haruka ona feto ida ba ne’ebá. Esforsu ne’e kontinua la’o, no ha’u hein katak iha tempu besik mai ita bele prejeta feto sira ne’e ba pozisaun lideransa, ‘’ Tenente Jenerál Falur Rate Laek Hateten.

Tenente Jenerál hatutan katak, F-FDTL mós kontinua fó oportunidade ba militár feto sira atu asume pozisaun iha estrutura komandu, inklui iha nivél eskalaun no komandu pelotaun iha Komponente Terrestre, Baucau.

Iha futuru militár feto sira sei koloka mós iha pozisaun komandu iha postu destakamentu sira, hodi asegura partisipasaun feto ne’ebé ekilibradu iha estrutura militár.

Diretór Interinu IDN, Nuno Corvelho Sarmento, hatete katak, Formasaun ne’e fó atensaun ba komprensaun kona-ba violénsia doméstika , inklui violénsia fízika, psikolójika, seksuál no ekonómika, ne’ebé bele akontese iha relasaun família ka parseiru íntimu. No formasaun ne’e kona-ba prevensaun violénsia doméstika, tanba ida ne’e tama iha knaar instituisaun iha área defeza no seguransa.

‘’ita hakarak promove sno hatudu katak ita-nia knaar la’os aprende de’it kona-ba asuntu defeza no seguransa, maibe bainhira ita divulga no fó sai hanoin sira hanesan ne’e, ita kontribui atu hametin pás no halakon violénsia domésstika iha ita-nia rain no iha ne’ebé de’it,’’ hatete Nuno Corvelho Sarmento.