𝗗𝗶́𝗹𝗶, 𝟮𝟳 𝗔𝗴𝗼𝘀𝘁𝘂 𝟮𝟬𝟮𝟲

Komisaun Ezekutiva Eletricidade de Timor-Leste, Empresa Públika (EDTL, E.P.), liuhusi Prezidente Komisaun Ezekutiva Dr. Paulo da Silva, akompaña husi Komisáriu Ezekutivu Servisu Koorporativu Sr. Julio de Jesus Gonçalves, Komisáriu Ezekutivu bá Servisu Tékniku, Eng.Roberto Manuel Marçal, Diretór DPSE, Diretór DRDAC,ekipa BIR MOP no ekipa tékniku relevante sira inklui PCA observa direitamente Panel RMU(Ring Main Unit) no Panel LV(Low Voltage) sistema underground nian ne’ebé hetan estragus husi ema deskoñesidu iha área parte Igreja Bekora nia oin kinta-feira ne’e.

Panel RMU no Panel LV ne’e hanesan elementu importante tebes iha sistema distribuisaun eletrisidade subteranu/underground. Nia funsaun prinsipál maka atu kontrola dalan enerjia, regula voltajen no asegura fornesimentu eletrisidade ho seguru bá komunidade, instituisaun nomos empreza sira iha área refere.

Aktus ne’ebé komete husi ema deskoñesidu bá propriedade eletrisidade ne’e mak hanesan estraga ou sobu odamatan husi panel RMU no LV no uza tinta pilox lori pinta iha panel RMU nia lolon.

Iha fatin hanesan, EDTL,E.P. informa kedas kazu ne’e bá Polísia Eskuadra Bekora hodi halo prosesu tuir lei. Parte polísia foti ona dadus iha lokál no halo hela verifikasaun bá CCTV iha área laran hodi identifika no buka hatene autor prinsipál bá aktu ladiak sira ne’e.

Iha oportunidade hanesan Prezidente Komisaun Ezekutiva Dr.Paulo da Silva husu bá komunidade tomak atu respeita no proteje infraestrutura estadu nian.

“Triste uitoan bá atitude hirak ne’e, tanba Governu hamutuk ho EDTL,E.P esforsu atu hadi’a kualidade fornesimentu enerjia elétrika bá kapital Dìli maibe infelizmente iha ema balu ne’ebé koko atu destroi” nia haktuir.

Aleinde ne’e Dr.Paulo da Silva mós hateten katak EDTL,E.P. sei informa bá parseiru ou kompañia sira atu mai observa no hadia fila fali propriedade hirak ne’e. Iha parte seluk kompañia ne’ebé tau matan bá servisu operasaun no manutensaun hahu ona monta ou solda lutu baja atu proteje panel hirak ne’e no EDTL,E.P. mós sei iha planu atu monta CCTV iha área lokalizasaun panel sira ne’e hodi nune’e fasil atu identifika karik akontese tan aktus ne’ebé komete husi ema deskoñesidu sira.

RMU no Panel LV ne’e la’os de’it propriedade EDTL, maibé hanesan mós bens públiku ne’ebé serve bá ita hotu. Aktu hanesan ne’e prejudika ita nia an rasik tanba sei afeta direitamente bá kualidade fornesimentu eletrisidade.

https://sdi.gov.tl/ministerio/presrealease/create

𝗠𝗶́𝗱𝗶𝗮-𝗠𝗢𝗣